შინაგან საქმეთა სამინისტროს განცხადებით, ზუგდიდში ლიბერთი ბანკის დაყაჩაღებაში ერთ-ერთი ბრალდებული პოლიციელია. უწყებაში ამბობენ, რომ დაკავებული ომის ვეტერანია და 2004 წლიდან სამინისტროს განსაკუთრებულ დავალებათა დეპარტამენტში რიგით პოზიციაზე მუშაობს.

ზუგდიდში ლიბერთი ბანკის საინკასაციო მანქანის დაყაჩაღების ბრალდებით ორი პირი დღეს, 7 მარტს დააკავეს. შსს-ს ინფორმაციით, ბრალდებულებმა ბანკის ერთ-ერთი ინკასატორი დაჭრეს და ფული გაიტაცეს.

უწყების ცნობით, ბრალდებულები რამდენიმე საათით ადრე ზუგდიდში, სოფელ ონარიაში ელექტროსადგურის დარაჯებს თავს დაესხნენ და იარაღის მუქარით პირადი ნივთები და მანქანა გასტაცეს. შსს-ში ამბობენ, რომ სწორედ ამ მანქანით დააყაჩაღეს ბანკი.

საქმეზე გამოძიება სისხლის სამართლის კოდექსის 179-ე, 143-ე, 236-ე, 237-ე და 118-ე მუხლებით მიმდინარეობს, რაც ორგანიზებული დაჯგუფების მიერ ჩადენილ ყაჩაღობას, თავისუფლების უკანონო აღკვეთას, ცეცხლსასროლი იარაღის მართლსაწინააღმდეგო შეძენა-შენახვა და დაუფლებას და ჯანმთელობის განზრახ დაზიანებას გულისხმობს. დანაშაული 11-დან 15 წლამდე პატიმრობას ითვალისწინებს.