მამუკა ხაზარაძის ადვოკატი, ზვიად კორძაძე აცხადებს, რომ მამუკა ხაზარაძემ არჩევნების პერიოდში განცხადებით, რომ "მისთვის ნაციონალური მოძრაობის რევანში მიუღებელია", მოთხოვნა შეასრულა. ადვოკატი განმარტავს, რომ მოთხოვნის შესრულების მოტივი იყო, რომ თიბისი ბანკისთვისა და ანაკლიისთვის საფრთხე აეცილებინა.

ხაზარაძის ადვოკატი ტელეკომპანია პირველის ეთერში საქართველოს პროკურატურის განცხადებას პასუხობს, სადაც ნათქვამია, რომ წერილი არის ასლი, არ აქვს ხელმოწერა და მისი წარმომავლობის გამოძიება შეუძლებელია.

"ადამიანმა წარმოადგინა წერილი იმ ფორმით, რა ფორმითაც ჰქონდა. რას ელოდა პროკურატურა, რომ ნოტარიულად იქნებოდა დამოწმებული და კანცელარიაში გატარებული თუ რა მოლოდინი ჰქონდა? თუ ასეთი ფორმით იქნებოდა ამას გამოძიება აღარ სჭირდებოდა, გამოძიება სჭირდება ისეთ საკითხებს რომელიც თავიდან არ არის ნათელი და დასკვნის გამოსატანად გამოძიება სჭირდება", — განაცხადა ადვოკატმა.

მისი თქმით, წერილის დედანის ექსპერტიზის პასუხის მიღების შემდეგ, რომელიც გაგზავნილია ინგლისში ექსპერტიზაზე, მიღებული დოკუმენტები საქართველოს პროკურატურას წარედგინება.

პროკურატურამ გაასაჯაროვა თიბისი ბანკის დამფუძნებლის, მამუკა ხაზარაძის მიერ მტკიცებულებად წარდგენილი დოკუმენტი, რომელიც ხაზარაძის განცხადებით, ამტკიცებს, რომ შს მინისტრი გიორგი გახარია მას ემუქრებოდა. წერილის მიხედვით, ხაზარაძეს სამ პირობის შესრულებას სთხოვდნენ. პირველი - ტელეკომპანია პირველმა შეიცვალოს სარედაქციო პოლიტიკა და ტელეკომპანია იმედის მსგავსად ჩაერთოს ომში ოპოზიცის წინააღმდეგ. მეორე — ხაზარაძემ გააკეთოს განცხადება, რომ მისთვის მიუღებელია ნაციონალური მოძრაობის რევანში და ბიზნესს კარგად ახსოვს, როგორ ექცეოდნენ წინა ხელისუფლების პირობებში. მესამე — ტელეკომპანია არტარეა, რომელიც ხაზარაძის საკუთრებაა, ჩაერთოს პოლიტიკურ კამპანიაში.