სახალხო დამცველი ნინო ლომჯარია მიმართავს იმ მოქალაქეებს, ვინც ფიქრობს, რომ უკანონოდ წაუყენეს ბრალი პირადი ცხოვრების კადრების გავრცელების საქმეზე.

"თუ ასეთ შემთხვევას აქვს ადგილი, სახალხო დამცველი მზადაა ყველა ფორმით გაუწიოს მას დახმარება, ეს იქნება სასამართლო მეგობრის მოსაზრება, თუ მზად ვართ, გავასაჩივროთ საკონსტიტუციო სასამართლოში ნორმის ამგვარი განმარტება", — განუცხადა ჟურნალისტებს ნინო ლომჯარიამ.

ის მიიჩნევს, რომ ამ დანაშაულთან მიმართებით მნიშვნელოვანია გათვალისწინებული იყოს განზრახვა: "მივესალმები იმას, რომ გამოყენებული იქნას პასუხისმგებლობის ზომა პირადი ცხოვრების კადრების გავრცელების შემთხვევაში, მაგრამ არ უნდა მივიღოთ მეორე უკიდურესობა და საზოგადოება არ უნდა ვაცხოვროთ ტერორში, რომ შეიძლება, მან მისგან გაუთვიცნობიერებლად მიიღოს გარკვეული კადრები ისე, რომ წარმოდგენაც არ ჰქონდეს და აღმოჩნდეს ბრალდებულის სკამზე. თუ ადამიანმა არ იცოდა და ისე მიიღო ეს კადრები, ამის გამო, რა თქმა უნდა, არ უნდა მიეცეს პასუხისგებაში".

ომბუდსმენი ასევე ამბობს, რომ როცა მოქალაქემ სრული განზრახვით გადააგზავნა აღნიშნული ვიდეომასალები, მიმაჩნია, რომ ეს არის ნამდვილად კანონის დარღვევა, დანაშაული: "არ უნდა დაგვავიწყდეს, რომ დავუცვათ იმ ადამიანის უფლებები, ვისაც უვრცელებენ".

ლომჯარიას თქმით, საზოგადოება არ იყო სათანადოდ ინფორმირებული, რომ ეს იყო დანაშაული.

ნინო ლომჯარია ფიქრობს, რომ სახელმწიფო ავლენს უუნარობას, როცა ვერ ააშკარავებს, ვინ დგას კადრების გავრცელების უკან.

"ჩვენ ვერცერთ შემთხვევაში ვერ გამოვავლინეთ, ვინ იყო ამ კადრების გავრცელების ინიციატორი. თუმცა იმის გამო, რომ ესაა სასტიკი დანაშაული, ერთ-ერთი ფორმა პრევენციისთვის ესაა: "გამოვიყენოთ და ავამოქმედოთ პასუხისმგებლობის ზომები კადრების გავრცელების შემთხვევაში".