შინაგან საქმეთა სამინისტრომ 14 იანვრიდან 31 იანვრის ჩათვლით, 18 დღეში ტექდათვალიერების არგავლის გამო 13 982 ჯარიმა გამოწერა. ამის შესახებ On.ge-ს შსს-ს საჯარო ინფორმაციის გაცემაზე პასუხისმგებელმა პირმა აცნობა.

ტექდათვალიერების არგავლის გამო გამოწერილი ჯარიმების 98 პროცენტზე მეტი (13 751) ე.წ. ჭკვიანი კამერების მიერ აღმოჩენილ ავტომობილებზე გამოიწერა. გამოწერილი ჯარიმების 61 პროცენტზე მეტი (8 563) თბილისზე მოდის, მეორე ადგილზე აჭარა (1 668), მესამეზე — იმერეთი (1 363).

საქართველოს ზოგადი ადმინისტრაციული კოდექსის 181 მუხლის პირველი და მეორე ნაწილის მიხედვით, ტექდათვალიერების არმქონე მანქანის მართვისთვის პირი 50 ლარით ჯარიმდება. შესაბამისად, გამოდის, რომ 18 დღეში 669 100 ლარის ჯარიმა გამოიწერა.

მთელი საქართველოს მასშტაბით უკვე მოქმედებს 1 440-ზე მეტი ვიდეოკამერა, მათ შორის 790-ზე მეტი ზოგადი ხედვის არის, 646 კი ე.წ. ჭკვიანი ვიდეოკამერა.

ტექდათვალიერების გავლის ვალდებულება

2019 წლის პირველი იანვრიდან საქართველოში ყველა ტიპის ავტომობილზე ტექდათვალიერების გავლა სავალდებულოა. ფიზიკური პირი, რომელსაც მანქანა არ შეუმოწმებია და 50 ლარით ჯარიმდება, იურიდიული პირი — 200 ლარით. დარღვევის არაღმოფხვრის შემთხვევაში ყოველი ერთი თვის გასვლის შემდეგ ჯარიმა იდენტურია.

14 იანვრიდან ე.წ. ჭკვიანი კამერები იმ ავტომობილებს აჯარიმებს, რომლებსაც ტექნიკური ინსპექტირების გავლის ვალდებულება ჰქონდა და ჯერ არ გაუვლია. ტექდათვალიერების გავლის თარიღი ავტომობილის რეგისტრაციაზეა დამოკიდებული (თუ ავტომობილი 20 იანვრის თარიღით არის რეგისტრირებული, ტექდათვალიერებაც 20 იანვრის ჩათვლით უნდა გაიაროს).