საქართველოს საპატრიარქოს განცხადებით, დეკანოზ გიორგი მამალაძის შეწყალებაზე შუამავლობას იმ შემთხვევაში აღძრავენ, თუ სასულიერო პირი ბრალს აღიარებს. საპატრიარქო განმარტავს, რომ შეწყალების შუამდგომლობით მხოლოდ იმ შემთხვევაში მიმართავს, თუ მსჯავრდებული დანაშაულს აღიარებს და ინანიებს.

როგორს საპატრიარქოს განცხადებაშია ნათქვამი, აღნიშნულ მოთხოვნას დიდი ხანია პატრიარქს უყენებენ, თუმცა მას თან ახლდა "დეზინფორმაცია, ცილისწამება, მუქარა და კარვის გაშლა".

"ასეთი, ერთი შეხედვით, არალოგიკური მოქმედება, ბუნებრივია, ბადებს ეჭვს იმისა, რომ განვითარებულ მოვლენებს აქვს მიზანმიმართული ხასიათი და ადვოკატებიც და დეკანოზის თანამდგომნიც, სინამდვილეში, პატიმრის ინტერესებს კი არ იცავენ, არამედ მის საქმეს იყენებენ ეკლესიის წინააღმდეგ ადრე დაწყებული კამპანიის გასაგრძელებლად", — აღნიშნულია განცხადებაში.

მათივე თქმით, ამ პროცესებში მონაწილეობას იღებენ ადამიანები, რომლებიც ეკლესიას ხშირად უპირისპირდებიან. საპატრიარქოს განცხადებით, დეკანოზი გიორგი მამალაძე და მისი ოჯახი "მიუღებელი მეთოდის მონაწილეები არიან":

"არ მოერიდნენ თავდაცვის მექანიზმად შანტაჟის გამოყენებას, რითაც ხელი შეუწყვეს თავისივე თავის საწინააღმდეგო მდგომარეობის შექმნას".

გარდა ამისა, საპატრიარქო საპატიმროდან მამალაძის დაგზავნილ წერილზე საუბრობს და მოუწოდებს დეკანოზს გაასაჯაროოს, რათა ყველამ გაიგოს რა ბრალდებებზეა საუბარი.

"ხალხს არ დარჩეს განცდა იმისა, თითქოს, ჩვენი მხრიდან, მისი გათავისუფლების თხოვნა რაღაცის გაუთქმელობის ფასად შეიძლება მოხდეს".

საპატრიარქოს მიაჩნია, რომ უნდა გასაჯაროვდეს გამოძიების მასალებიც და იმედოვნებენ, რომ საგამოძიებო ორგანოები გაითვალისწინებენ შექმნილ ვითარებას და გამონაკლისს დაუშვებენ.

დეკანოზ გიორგი მამალაძის ძმამ, თორნიკე მამალაძემ რამდენიმე კვირის წინ საპატრიარქოსთან გამართულ აქციაზე მოითხოვა, რომ პატრიარქს პრეზიდენტისთვის შეწყალების თხოვნით მიემართა.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.