ჭიდაობის ფედერაციაში პრეზიდიუმის სხდომა დასრულდა. მოჭიდავ ზურაბ დათუნაშვილის თქმით, სხდომაზე ვეტერანმა მოჭიდავეებმა მოუწოდეს მას და გეგა გეგეშიძეს შერიგებისკენ. მისი თქმით, გეგეშიძესთან შერიგებას არ აპირებს.

"ვეტერანი პრეზიდიუმის წარმომადგენლები ამბობენ, რომ უნდა შევრიგდეთ და ამის შემდეგ არავინ დაიჩაგრება, ჩემი პოზიცია არის ის, რომ მე ვერ ვიქნები ამ ადამიანთან, თუ არ გამიშვებენ, დამბლოკონ", — განაცხადა ზურაბ დათუნაშვილმა.

მისი თქმით, პრეზიდიუმის წარმომადგენლებმა უთხრეს, რომ მისი ნაკრებიდან გარიცხვის საკითხი მათ გარდა ოლიმპიურ კომიტეტსა და სპორტის სამინისტროსაც ეხება და მასთან უნდა შეათანხმონ.

პრეზიდიუმის სხდომის ერთ-ერთი წარმომადგენლის განმარტებით, სხდომაზე ორი საკითხი დააყენეს, ერთი გეგეშიძისა და დათუნაშვილის შერიგებას ეხებოდა. ვინაიდან დათუნაშვილმა შერიგებაზე უარი განაცხადა მეორე საკითხად მისი ნაკრებიდან წასვლის საკითხი განიხილება. წასვლის მოთხოვნა თავად დათუნაშვილმა დააყენა.

საქართველოს ჭიდაობის ფედერაციაში პრეზიდიუმის სხდომა დასრულდა, სადაც 11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს მომხდარ ინციდენტს განიხილავდნენ.

სხდომაზე შესვლამდე დათუნაშვილმა მედიასთან კომენტარი გააკეთა და კიდევ ერთხელ დააფიქსირა საკუთარი მოთხოვნა: "გადადგეს გეგა გეგეშიძე". პრეზიდიუმის პარალელურად ფედერაციასთან აქცია იმართებოდა.

"გეგეშიძე მოძალადეა! ხვალ მსხვერპლი შეიძლება გახდე შენ!" — ამ ტრანსფარანტებით სამოქალაქო აქტივისტები გეგა გეგეშიძის გადადგომას ითხოვენ.

რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. მოჭიდავეების ნაწილი ფედერაციის პრეზიდენტის, გეგა გეგეშიძის დაკავებას აპროტესტებს. ისინი გეგეშიძის გათავისუფლებას ითხოვენ და ამბობენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა.

ამავე თემაზე: