ამ წუთებში ჭიდაობის ეროვნულ ფედერაციასთან მოქალაქეების ნაწილი მოჭიდავე ზურა დათუნაშვილის მხარდამჭერ აქციას მართავს. აქციის ორგანიზატორი მოძრაობა რუსეთი ოკუპანტიაა.

აქციაზე შეკრებილები 11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს მომხდარ ინციდენტს აპროტესტებენ. ისინი მოითხოვენ ჭიდაობის ფედერაციის პრეზიდენტის გეგა გეგეშიძის გადადგომასა და კანონის წინაშე პასუხის გებას. ბანერებზე, რომლითაც აქციის მონაწილეები, პროტესტს გამოხატავენ წერია: "ხვალ მსხვერპლი შეიძლება გახდე შენ", "გეგეშიძე მოძალადეა", "პრეზიდიუმი = გეგას საძმაკაცო", "უსამართლო სასამართლომ მოსამართლე თანამდებობაზე დატოვა".

ფოტო: გელა ბოჩიკაშვილი / On.ge

აქციის პარალელურად ფედერაციაში პრეზიდიუმის სხდომა იმართება, სადაც 11 იანვარს მომხდარ შემთხვევას განიხილავენ.

ფოტო: გელა ბოჩიკაშვილი / On.ge

რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. მოჭიდავეების ნაწილი ფედერაციის პრეზიდენტის, გეგა გეგეშიძის დაკავებას აპროტესტებს. ისინი გეგეშიძის გათავისუფლებას ითხოვენ და ამბობენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა.

ამავე თემაზე: