ევროპის ჩემპიონი, ზურაბ დათუნაშვილი ამბობს, რომ იმ შემთხვევაშიც კი, თუ ჭიდაობის ფედერაციის პრეზიდენტს, გეგა გეგეშიძეს შეურიგდება, კარიერის გაგრძელების საშუალება მაინც არ მიეცემა.

"ვაპირებ, რომ გავიმარჯვო. სხვანაირად რომ გავჩერდე ამ ფედერაციაში, [რომ შევურიგდე გეგა გეგეშიძეს] არ მომეცემა კარიერის გაგრძელების საშუალება. არ მომცემენ საშუალებას, სამართლიანად დავამტკიცო ჩემი სიმართლე", — ამბობს დათუნაშვილი.

მისი თქმით, გეგეშიძეს შერიგება არ უნდა, მას უბრალოდ სურს, ის გააჩუმოს და სკამი შეინარჩუნოს. დათუნაშვილის თქმით, გეგეშიძის სინანული ფორმალობაა და რეალურად არაფერი შეიცვლება.

დათუნაშვილი ამბობს, რომ სხვა მოჭიდავეები უჭერენ მხარს, მაგრამ საჯაროდ ვერ ამბობენ, რადგან ეშინიათ, "მათაც იგივე არ გადახდეთ".

დაპირისპირება ჭიდაობის ფედერაციაში

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. მოჭიდავეების ნაწილი ფედერაციის პრეზიდენტის, გეგა გეგეშიძის დაკავებას აპროტესტებს. ისინი გეგეშიძის გათავისუფლებას ითხოვენ და ამბობენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა.