რუსთავის საქალაქო სასამართლოს თავმჯდომარე მამია ფხაკაძემ მისი ქონების შესახებ მომზადებული მასალის გამო ტელეკომპანია რუსთავი 2-ის წინააღმდეგ საქართველოს ჟურნალისტური ეთიკის ქარტიას მიმართა. მასალა 16 თებერვალს გავიდა ეთერში და მოსამართლეთა ქონებას შეეხებოდა.

"დიღომში ქართველი მილიონერების უბანში ცხოვრობს რუსთავის საქალაქო სასამართლოს თავმჯდომარე, მამია ფხაკაძე. თეთრად შეღებილი წითელსახურავიანი საცხოვრებლის ფასადი ხით არის მოპირკეთებული. ფანჯრებს კი მეტალის გისოსები იცავს. სოფელ დიღომში მათ 400 კვადრატული 2011 წელს 12 ათას დოლარად იყიდეს. სახლი კი ერთი წლის შემდეგ ააშენეს, რომელიც 87 ათასი ლარი დაუჯდათ", — ამბობდა ჟურნალისტი სიუჟეტში.

მოსამართლეს მიაჩნია, რომ ჟურნალისტმა ქარტიის პირველი და მესამე მუხლები დაარღვია. მისი აზრით, სიუჟეტში არაზუსტი ფაქტები გაშუქდა და მნიშვნელოვანი ფაქტები მიიჩქმალა.

ტელეკომპანია რუსთავი 2-ს მოსამართლეთა საქმიანობის შესახებ კრიტიკული შინაარსის მასალა არაერთხელ მოუმზადებია.