გაერთიანებული ოპოზიციის წევრის, ზვიად კუპრავას თქმით, სასამართლოს უპატივცემულობის საქმეზე აღკვეთის ღონისძიებად პატიმრობა შეეფარდა. კუპრავა ამბობს, რომ სასამართლო სხდომას არ ესწრებოდა და ახლა პოლიციას სამსახურში, გაერთიანებული ოპოზიციის შტაბში ელოდება.

"ხელისუფლების დავალებით გაიცა ჩემი დაკავების შესახებ სანქცია. ისე, რომ თვალი არ დაუხამხამებია მოსამართლეს. ჩემს ოფისში და სამუშაო გარემოში ვარ და არ ვაპირებ ჩემი გრაფიკი შევცვალო. ვიმუშავებ, სანამ საშუალება მომეცემა", — განუცხადა კუპრავამ On.ge-ს.

თბილისის საქალაქო სასამართლოს პრესსამსახურში On.ge-ს განუცხადეს, რომ კუპრავას საქმის განხილვა ჯერ კიდევ მიმდინარეობს და აღკვეთის ღონისძიების შეფარდების შესახებ ინფორმაციას ვერ დაადასტურებენ.

კუპრავას ინციდენტი სასამართლოში

11 ივნისს თბილისის საქალაქო სასამართლოს სასადილოში დაპირისპირება მოხდა რა დროსაც ზვიად კუპრავა დააკავეს. პროკურატურა კუპრავას სასამართლოს უპატივცემულობას ედავებოდა. საბრალდებო დასკვნის თანახმად, მიუხედავად იმისა, რომ 14-დან 15 საათამდე მოსამართლემ შესვენება გამოაცხადა, ზვიად კუპრავა არ გათავისუფლებულა დაკავებიდან, იგი გავიდა სხდომის დარბაზიდან და თვითნებურად ჩავიდა ამავე სასამართლოს ადმინისტრაციული შენობის სასადილოში.

ზაზა სარალიძე, რომელიც ინციდენტის დროს კუპრავას ახლდა ამბობდა, რომ ისინი სადილობდნენ. მოგვიანებით, მათთან სამართალდამცველები მივიდნენ და მოთხოვეს სასამართლო დარბაზში დაბრუნება. ვიდეოში, რომელიც რუსთავი 2-მა გაავრცელა, ჩანს რომ ზვიად კუპრავა ძალის გამოყენებით დააბრუნეს დარბაზში. კუპრავა ამბობდა, რომ სამართალდამცავები მას ედავებოდნენ, რომ დაუმორჩილებლობის ნიშნად სხვისი თეფშიდან დაიწყო ჭამა, როცა საკუთარი დამთავრებული ჰქონდა.

9 ივლისს სასადილოს ინციდენტის საქმეზე კუპრავას აღკვეთი ღონისძიების სახით ხუთი ათასლარიანი გირაო შეუფარდეს.