პარლამენტის პლენარულ სხდომაზე პატრიოტთა ალიანსის ლიდერმა, ირმა ინაშვილმა იურიდიულ საკითხთა კომიტეტის თავმჯდომარეს, ანრი ოხანაშვილს ჰკითხა, წავიდოდა თუ არა სასამართლოდან ლევან მურუსიძე ან მიხეილ ჩინჩალაძე რომ ყოფილიყო.

ოხანაშვილმა თქვა, რომ თუ დაუდგება დრო ან მის კეთილსინდისიერებასთან და კომპტენტურობასთან დაკავშირებით საზოგადოებაში კითხვები გაჩნდება, ის მზად არის ყველაფერს გასცეს პასუხი.

"თუ საზოგადოების დარწმუნებას ვერ შევძლებ, ჩემთვის არანაირი პოზიციას არასოდეს არ ჰქონია მნიშვნელობა და არასოდეს ჩემთვის არანაირი პოზიცია არ ყოფილა და არ იქნება რაიმე ხიბლი იმისა, რომ საზოგადოების ინტერესების საწინააღმდეგოდ შევასრულო რაიმე საქმიანობა", — თქვა ოხანაშვილმა.

საქართველოს პარლამენტში ეკა ბესელიასა და სხვა დეპუტატების კანონპროექტს განიხილავენ მოსამართლეთა უვადოდ დანიშვნის დროებით შეჩერების შესახებ. განხილვის მიუხედავად, უმრავლესობამ გადაწყვეტილება უკვე მიიღო. ისინი კანონპროექტს მხარს არ დაუჭერენ. ამის შესახებ პოლიტსაბჭოს სხდომის დასრულების შემდეგ საქართველოს პარლამენტის თავმჯდომარემ ირაკლი კობახიძემ განაცხადა.