NBC News-ის ინფორმაციით, აშშ-ს პრეზიდენტის, დონალდ ტრამპის ადმინისტრაცია ჰომოსექსუალობის დეკრიმინალიზაციის მიზნით გლობალურ კამპანიას იწყებს.

ტელეკომპანიის ცნობით, თეთრ სახლში განმარტავენ, რომ კამპანიის მიზანია იმ ქვეყნებში, სადაც ერთი და იმავე სქესის პირებს შორის სქესობრივი აქტი კანონით დასჯადია, ჰომოსექსუალობის დეკრიმინალიზაცია მოხდეს. საუბარია მათ შორის ირანზეც.

ამავე ტელეკომპანიის ინფორმაციით, კამპანიას გერმანიაში აშშ-ს ელჩი, რიჩარდ გრენელი უხელმძღვანელებს, რომელიც ღიად გეია. მისი თქმით, შემაშფოთებელია, რომ 21-ე საუკუნეში 70 ქვეყანაში არსებობს კანონი, რომლითაც ლგბტი სტატუსი ან ქცევა დასჯადია.