არ არსებობს უმუშევარი ქალი — ამ სლოგანით 8 მარტს არასამთავრობო ორგანიზაციები სოლიდარობის ქსელი და ადამიანის უფლებების სწავლების ცენტრი (EMC) მსვლელობას გამართავენ. ქალთა დაცვის საერთაშორისო დღეს ისინი მანიფესტს წარადგენენ, რომელშიც ქალების უხილავ და დაუფასებელ შრომაზე საუბრობენ.

ფოტო: სოლიდარობის ქსელი / FB

მანიფესტში ხაზგასმულია, რომ სამსახურში 40 საათზე მეტი ხნის მუშაობის შემდეგ, ქალებს სახლში "მეორე ცვლა" ელოდებათ. მათი თქმით, ერთ-ერთი გამოსავალი ამ მდგომარეობის გასაუმჯობესებლად სამუშაო საათების მკაცრი რეგულირებაა.

"გარდა იმისა, რომ ჩვენ ნაკლებ ხელფასს ვიღებთ, ჩვენ გვიწევს დამატებითი ფუნქციების შესრულება, რომლებიც ქალის "ბუნებრივ" მოვალეობებად ითვლება, როგორიცაა: დალაგება, დასუფთავება, ყავის მომზადება, წესრიგის დაცვა და სხვა მრავალი რუტინული საქმის შესრულება. ამასობაში, გვიწევს მძიმე ტვრითის აწევაც, საათობით ფეხზე დგომა და ღამეების გათენება. ქალად ყოფნა ხშირად უფრო სასჯელია, ვიდრე პრივილეგია და შეღავათი", — წერია განცხადების ტექსტში.

გარდა ამისა ისინი დეკრეტული შვებულების პირობების გაუმჯობესებას ითხოვენ. მათი თქმით, ქალებმა უკვე გამაოცხადეს გაფიცვა და აღარ აჩენენ ბავშვებს, რადგან კაბალურ პირობებში ცხოვრობენ. ერთ-ერთი მოთხოვნაა ისიც, რომ მეძუძურ დედებთან ერთად შეღავათი მცირეწლოვანი ასაკის ბავშვის მშობლებსაც ჰქონდეთ. ასევე ორ წლამდე გაიზარდოს დეკრეტული შვებულება და საჯარო ბაგა-ბაღებში ბავშვების მიღება ექვსი თვიდან ორ წლამდე იყოს.

მანიფესტის ავტორები სექსუალური შევიწროების საკითხსაც ეხმიანებიან. მათი თქმით, შევიწროება უნდა დასრულდეს და საზოგადოების ყოველი წევრი ვალდებულია ჩაერიოს და დაიცვას ერთმანეთი მსგავსი ფორმის ძალადობისგან.

ქალების ერთ-ერთი მოთხოვნა განათლების სისტემას და მისი ხარისხის ამაღლებასაც ეხება. მათი თქმით, მნიშვნელოვანია, განათლების სისტემა არამხოლოდ ზოგად და სპეციფიურ ცოდნას აძლევდეს ადამიანს, არამედ უყალიბებდეს მას ფართო, სამოქალაქო ცნობიერებას.

მანიფესტის მოთხოვნებშია ღირსეული პენსია, ხარისხიანი ჯანდაცვა, გაუმჯობესებული საჯარო ტრანსპორტი, სუფთა ეკოლოგია, საბინაო პოლიტიკის დახვეწა და სხვა მოთხოვნებიც.

"8 მარტს გამოვდივართ ყველა ქალისთვის, რადგან გვჯერა ჩვენი შესაძლებლობების, ვიცით რა გამოვიარეთ და რა არის შესაცვლელი. საერთო ძალებით, თანადგომითა და სოლიდარობით შეგვიძლია უკეთესი რეალობის შექმნა", — წერია განცხადებაში.

მანიფესტის სრული ტექსტი იხილეთ აქ.