დეპუტატ ეკა ბესელიას თქმით, თუ სესიაზე მოსამართლეების დანიშვნის მორატორიუმის კანონპროექტს მხარი არ დაუჭირეს, საკონსტიტუციო ცვლილებას მოითხოვს და ხელმოწერების შეგროვებას დაიწყებს.

"ყველას ლუსტრირება მოხდება. ყველა იმ ადამიანის, ვინც პარლამენტში გამოხატავს არა ხალხის ნებას, არამედ იმ მცირე ჯგუფისას, რომელსაც წარმოადგენს იუსტიციის უმაღლესი საბჭოს ნაწილი", — განაცხადა ეკა ბესელიამ.

იურიდიულ საკითხთა კომიტეტმა ეკა ბესელიასა და კიდევ 8 დეპუტატის კანონპროექტს მოსამართლეების უვადოდ დანიშვნის დროებით შეჩერებაზე მხარი 18 თებერვალს არ დაუჭირა. კანონპროექტის განხილვა კომიტეტზე დაახლოებით ხუთი საათის განმავლობაში სიტყვიერი დაპირისპირებისა და ხმაურის ფონზე მიმდინარეობდა.

მიუხედავად იმისა, რომ კანონპროექტი იურიდიულ საკითხთა კომიტეტის სხდომაზე ჩავარდა, მას ხვალ, 19 თებერვლის პლენარულ სხდომაზე მაინც განიხილავენ.

კანონპროექტის მიხედვით, რაიონულ და სააპელაციო სასამართლოებში მოსამართლეთა უვადოდ გამწესება 2024 წლის 31 დეკემბრამდე უნდა შეჩერდეს. პროექტის ავტორებმა საკითხის დაჩქარებულ ვადებში განხილვა ბიუროს სხდომაზე მოითხოვეს.