"თქვენ არანაირი პასუხი არ გჭირდებათ, თქვენ უსმენთ მარტო იუსტიციის საბჭოს და საბჭოს ხმა გესმით, როგორც ბულბულის ხმა", — ამ სიტყვებით მიმართა იურიდიულ საკითხთა კომიტეტის ყოფილმა თავმჯდომარემ, ეკა ბესელიამ იურიდიულ საკითხთა კომიტეტის ახალ თავმჯდომარეს ანრი ოხანაშვილს.

ეკა ბესელიას ეს განცხადება ანრი ოხანაშვილის გამოსვლას მოჰყვა. დეპუტატმა განაცხადა, რომ მან მთავარ კითხვაზე ვერ მიიღო პასუხი, თუ რას ეუბნებიან იმ კეთილსინდისიერ მოსამართლეებს, რომლებიც უვადოდ დანიშვნას ელოდებიან.

"რა ძალიან კორექტული ხართ, რა ძალიან სამწუხაროა, დიდი მადლობა. თქვენ ჩვენს საზოგადოებასთან არ მჭირდებით შუამავლად", — ასე უპასუხა ანრი ოხანაშვილმა ბესელიას განცხადებას, რომ მას მხოლოდ იუსტიციის საბჭოს ხმა ესმის.

ანრი ოხანაშვილის საუბრის პარალელურად ბესელიამ განაცხადა: "ამათზე საუკეთესო დამცველები საბჭოს აქ რომ ჰყავს, არ არსებობს, იყავით საბჭოს ადვოკატები".

ანრი ოხანაშვილის თქმით, მოსამართლეების უვადოდ დანიშვნის დროებით შეჩერების კანონპროექტის ინიციატორი ეკა ბესელიაა და კითხვებს პასუხი ჯერ მან უნდა გასცეს.

იურიდიულ საკითხთა კომიტეტის სხდომაზე მოსამართლეთა უვადოდ გამწესების 2024 წლის 31 დეკემბრამდე გადაწევას დაჩქარებული წესით განიხილავენ. ინიციატივას, კომიტეტის გადაწყვეტილების მიუხედავად, პირველივე პლენარულ სხდომაზე განიხილავენ. კანონპროექტის ავტორია ეკა ბესელია რვა ქართული ოცნების დეპუტატთან ერთად.