ილიას სახელმწიფო უნივერსიტეტის რექტორი, გიგა ზედანია და სტუდენტები შეთანხმდნენ, რომ მოლაპარაკებებს გააგრძელებენ. შეხვედრა დაახლოებით ორ საათს გაგრძელდა. მას აკადემიური საბჭოს წევრები და სტუდენტები ესწრებოდნენ.

ზედანიამ ჟურნალისტებს უთხრა, რომ შეხვედრა შედეგზე ორიენტირებული იყო. მისი თქმით, სტუდენტებთან განიხილეს ის საკითხები, რომელზეც შეთანხმდება ვერ ხდება.

"ეს არის, მაგალითად, სტუდენტური ჯგუფის ჩართვა ბიზნესის სკოლის ავტონომიის მექანიზმების განსაზღვრაში, ახალშექმნილ ფაკულტეტზე. ვთქვით, რომ ცალკე ჯგუფი შეიქმნება სტუდენტური რეფორმების, რომელიც იმუშავებს უნივერსიტეტის დონეზე, წესდებაში ცვლილებებზე. ასევე, აღვნიშნეთ, რომ იმ საკითხებზე, სადაც აზრთა სხვადასხვაობაა, ჩვენ გავაგრძელებთ მუშაობას", — თქვა ზედანიამ.

მისი თქმით, ბიზნესის სკოლის ყოფილი დეკანის, გიორგი ქადაგიძის დაბრუნებაზე საუბარი არ ყოფილა. ზედანიამ იმედი გამოთქვა, რომ მოლაპარაკებები ისევ კონსტრუქციულ რეჟიმში გაგრძელდება.

"ახალი სტრუქტურა რჩევა. ჩვენ ვიმსჯელეთ მის სახელსა და შედგენილობაზეც. არსებობს საკითხები, სადაც შეგვიძლია ვთქვათ, რომ შეთანხმება შედგა. მათ შორის ბიზნესის სკოლის ავტონომიის სტატუსი და მექანიზმები ამ ახალ ფაკულტეტზე და მეორე, წესდებაში განსახორციელებელი ცვლილებები და ორივე პროცესში სტუდენტების ჩართულობა", — აღნიშნა ზედანიამ.

სტუდენტი, მარიამ ჯომიდავა ამბობს, რომ რექტორთან შეხვედრაზე ორი შეთანხმება შედგა. პირველი, ფაკულტეტის ცვლილება, რომელშიც ჩართულები იქნებიან აკადემიური საბჭოს წევრები, სტუდენტები და ბიზნესის ფაკულტეტის წარმომადგენლები. მეორე კი, წესდების ცვლილებაა. მისივე თქმით, სტუდენტები შიმშილობის შეწყვეტის შესახებ გადაწყვეტილებას ერთიანად მიიღებენ.

31 იანვარს გიორგი ქადაგიძემ განაცხადა, რომ უნივერსიტეტისთვის ცვლილებები და ძირეული სიახლეები მიუღებელია და თანამდებობიდან მოხსნეს. უნივერსიტეტის რექტორის, გიგა ზედანიას თქმით, სტრუქტურული რეფორმაში მონაწილეობაზე გიორგი ქადაგიძე უარს ამბობდა. უნივერსიტეტში ახალი ფაკულტეტი მენეჯმენტის, ტექნოლოგიებისა და განათლების ფაკულტეტი შეიქმნა, რომლის ნაწილიც ბიზნესსკოლა გახდა. ამ ცვლილებას უნივერსიტეტის სტუდენტები აპროტესტებენ.