ილიას სახელმწიფო უნივერსიტეტის ბიზნესის სკოლის ყოფილი დეკანი, გიორგი ქადაგიძე აცხადებს, რომ უნივერსიტეტისთვის ცვლილებები და ძირეული სიახლეები მიუღებელია და თანამდებობიდან მოხსნეს. ამის შესახებ ქადაგიძემ Facebook-ში დაწერა.

"პირადი მიზეზების გამო მომიწია ერთი კვირით ქვეყნის დატოვება. ამ პერიოდს "მომზადებული" ხვდება უნივერსიტეტის ადმინისტრაცია, ატარებს ე.წ. რეორგანიზაციას, რომლის შედეგად, სამწუხაროდ, აღარ ვარ სკოლის დეკანი", — განმარტავს ქადაგიძე.

ის აცხადებს, რომ პირადი მიზეზის გამო მეტის თქმა არ შეუძლია და პრობლემების ჩამონათვალის შესახებ აკადემიური საბჭოსთვის მიწერილი წერილის შინაარსს ასაჯაროებს.

უნივერსიტეტის რექტორი, გიგა ზედანიაც ფეისბუქით გამოეხმაურა ქადაგიძის პოსტს. მისი თქმით, სტრუქტურული რეფორმაში მონაწილეობაზე გიორგი ქადაგიძე უარს ამბობდა.

"გავაკეთეთ რეფორმა, შევქმენით ახალი ფაკულტეტი, გამოვაცხადეთ ახალი კონკურსი დეკანის თანამდებობაზე, რომელში მონაწილეობაც ფაკულტეტის ნებისმიერ პროფესორს შეუძლია, მათ შორის გიორგი ქადაგიძესაც. სიახლის ნამდვილად არ გვეშინია, არამედ სიახლე გვჭირდება. "მოძრაობა და მარტო მოძრაობა." ეს ბოლო რეფორმაც ამის დასტურია", — წერს ზედანია.

გიორგი ქადაგიძე ილიაუნიში ბიზნესის სკოლის დეკანის თანამდებობაზე დაახლოებით ერთი წელი მუშაობდა.

გიორგი ქადაგიძის ბიოგრაფია

2016 წლიდან ქადაგიძე ილიაუნის ბიზნესს სკოლის სრული პროფესორია. 2009-2016 წლებში ქადაგიძე ეროვნული ბანკის პრეზიდენტი იყო. წლების განმავლობაში ის, სხვადასხვა საჯარო მოხელის პოზიციას იკავებდა, იყო თბილისის მერიის საფინანსო სამსახურის უფროსი და საქართველოს გენერალურ პროკურატურის ეკონომიკური დეპარტამენტის ხელმძღვანელი.

საჯარო სამსახურის გარდა, ქადაგიძე სხვადასხვა დროს მუშაობდა საერთაშორისო სავალუტო ფონდის მმართველად, ევროპის რეკონსტრუქციისა და განვითარების ბანკის ალტერნატიული მმართველად და საქართველოს მხრიდან შავი ზღვის ვაჭრობისა და განვითარების ბანკის მმართველად.

2001 წელს გიორგი ქადაგიძემ ბიზნესის მართვის ევროპული სკოლა ადმინისტრირების სპეციალობის მიმართულებით დაამთავრა, იმავე წელს მას მიენიჭა აშშ-ს პრინსტონის უნივერსიტეტის ბაკალავრის ხარისხიც.