თუ მუნიციპალიტეტის საკუთრებაში არსებულ მიწის ნაკვეთს უნებართვოდ დაიკავებთ და ისარგებლებთ, დაჯარიმდებით. ამის შესახებ საქართველოს პარლამენტში უმრავლესობის დეპუტატების მიერ შემუშავებულ კანონპროექტშია ნათქვამი.

კანონპროექტის განმარტებითი ბარათის მიხედვით, სახელმწიფო და მუნიციპალიტეტის საკუთრებაში არსებული მიწის ნაკვეთების უნებართვო დაკავება ან/და მიწათსარგებლობის უფლების გარეშე სარგებლობა იწვევს დაჯარიმებას.

ამის მიუხედავად არ არსებობს აღსრულების მექანიზმი, რომელიც მუნიციპალიტეტებს უკანონო ქმედებების აღკვეთის საშუალებას მისცემს. კანონპროექტის დამტკიცების შემთხვევაში მუნიციპალიტეტები კანონის დამრღვევების დაჯარიმებას შეძლებენ. ცვლილება არ გავრცელდება თბილისის მუნიციპალიტეტზე.

კანონპროექტი ადგენს ჯარიმების ოდენობებს. თვითმმართველი ერთეულის საკუთრებაში არსებული მიწის ნაკვეთის უნებართვოდ დაკავება ან მიწათსარგებლობის უფლების გარეშე სარგებლობა გამოიწვევს დაჯარიმებას 1000 ლარის ოდენობით, ხოლო გამეორების შემთხვევაში - 2000 ლარის ოდენობით.

კანონპროექტის ინიციატორები არიან დეპუტატები: ზაზა გაბუნია, გიორგი კახიანი, მერაბ ქვარაია, კობა ლურსმანაშვილი.