ესპანეთის მთავრობამ დიქტატორ დაცემულთა ველიდან ფრანცისკო ფრანკოს ნეშტის გადასვენებას მხარი დაუჭირა და მის ოჯახს ახალი საფლავის მოსაძებნად 15-დღიანი ვადა მისცა. წინააღმდეგ შემთხვევაში მთავრობა ადგილს თვითონ შეარჩევს.

ფრანკოს ოჯახს ულტიმატუმი რამდენიმე საათში წაუყენეს მას შემდეგ, რაც ქვეყნის პრემიერ-მინისტრმა, პედრო სანჩესმა 28 აპრილს ვადამდელი საპარლამენტო არჩევნები დანიშნა.

ფრანკოს ნეშტის ექსჰუმაციას მთავრობამ მხარი 2018 წლის აგვისტოში დაუჭირა. მოსალოდნელია, რომ ფრანკოს ოჯახმა გადაწყვეტილების გასასაჩივრებლად უმაღლეს სასამართლოს მიმართოს.

2007 წლის კანონით საჯაროდ დიქტატორის დიდება აიკრძალა. ესპანეთის ხელისუფლება კი ამბობს, რომ მემორიალი საზოგადოებრივი ადგილია.

დაცემულთა ველი ფრანკოს ბრძანებით აშენდა და ესპანეთის სამოქალაქო ომში დაღუპულებს მიეძღვნა. მემორიალის აშენებაში ფრანკოს მოწინააღმდეგე რესპუბლიკელები მონაწილეობდნენ. ფრანცისკო ფრანკო დაცემულთა ველში 1975 წელს გარდაცვალების შემდეგ დაკრძალეს. ამ დრომდე იქ მისი მხარდამჭერები მიდიან და პატივს მიაგებენ.