სლოვენიის პარლამენტის წევრმა დარი კრაიჩიჩმა აღიარა, რომ მაღაზიაში სენდვიჩი მოიპარა, რის გამოც მანდატი დატოვა. ინფორმაცია ამის შესახებ 14 თებერვალს გახდა ცნობილი.

კრაიჩიჩი მმართველი პარტიის წევრია. ქურდობა მან პარლამენტის სხდომაზე აღიარა. როგორც თვითონ ყვება, უნდოდა მაღაზიის დაცვის სისტემა შეემოწმებინა, რადგან პერსონალი ყურადღებას არ აქცევდა. კრაიჩიჩის თქმით, სწორედ მაშინ გადაწყვიტა მაღაზია თანხის გადაუხდელად დაეტოვებინა.

პოლიტიკოსი ამბობს, რომ მსგავსი რამ პირველად გააკეთა და მაღაზიიდან გამოსვლის შემდეგ უკან არავინ ადევნებია. მანვე დაამატა, რომ მოგვიანებით სუპერმარკეტში დაბრუნდა და თანხა გადაიხადა. "სოციალური ექსპერიმენტის" გამო პოლიტიკოსმა ბოდიში მოიხადა.