პირადი ცხოვრების ამსახველი კადრების გავრცელების ბრალდებით დაკავებული ზაალ ლატარია ნაციონალური მოძრაობის წევრია. ამის შესახებ ინფორმაცია On.ge-ს პარტიის პრესსამსახურში განუცხადეს.

მათი ცნობით, ზაალ ლატარია წინასაარჩევნო პერიოდში ნაციონალური მოძრაობის წარმომადგენელი იყო სოფელ კოლხიდაში. ზაალ ლატარია წინა ხელისუფლების დროს საქართველოს თავდაცვის სამინისტროში მუშაობდა, ის სპეცრაზმელი იყო.

ზაალ ლატარიამ ჟურნალისტებთან განაცხადა, რომ მას პროვოკაცია მოუწყვეს.

"ტელეფონიც შემოწმებული აქვთ, ვერაფერი ვერ იპოვეს, ალბათ შეგნებულად იყო ეს ყველაფერი პროვოკაციაზე წამოსაგებად. მიზეზი ის არის, რომ მე ვარ მებრძოლი, მიზეზი ის არის, რომ ჩემი ცხოვრება ამ ქვეყანას შევწირე ბავშვობიდან დღემდე, ახლა ვარ განადგურებული", — აცხადებს ზაალ ლატარია.

შინაგან საქმეთა სამინისტროს ინფორმაციით, ბრალდებულმა მობილური ინტერნეტაპლიკაციის მეშვეობით გაავრცელა პირადი ცხოვრების ამსახველი ვიდეოჩანაწერი. დაკავებული სპეცრაზმის ყოფილი თანამშრომელი ზაალ ლატარიაა.

ინტერნეტში ეკა ბესელიას პირადი ცხოვრების ამსახველი კადრები გავრცელდა. ორივე შემთხვევაში დეპუტატმა საჯაროდ თქვა, რომ ეს ვიდეომასალა მას ფარულად გადაუღეს. ვიდეომასალის გავრცელებას წინ უსწრებდა ბესელიას დაპირისპირება იმ 10-კაციან სიასთან, რომელიც უზენაეს სასამართლოში უვადო მოსამართლეებად უნდა გამწესებულიყო.