საქართველოს განათლების სამინისტროში არ გამორიცხავენ, რომ 2023-24 წლისთვის, შესაძლოა, ეროვნული გამოცდების ახალი მოდელი დანერგოს. ამის შესახებ საქართველოს განათლების, მეცნიერების, კულტურისა და სპორტის მინისტრის მოადგილემ ირინა აბულაძემ ჟურნალისტებს განუცხადა.

მისი თქმით, მსჯელობენ საგამოცდო მოდელზე, რომელიც ერთ დიდ ცენტრალიზებულ გამოცდას გულისხმობს. ეს გამოცდა საგნისა და უნარის გაერთიანებული ვარიანტი უნდა იყოს.

"ამის გარდა, შესაძლოა, არსებობდეს სამოტივაციო წერილი, პროექტები სხვადასხვა წყაროები, რის მიხედვითაც უნივერსიტეტები შეარჩევენ სტუდენტებს. თუმცა ეს არის შორეული პერსპექტივა ასე ვთქვათ. თუ ჩვენ ამ ყველაფერზე შევთანხმდით და ეტაპობრივად დავგეგმეთ და წავიდა წინ ყველაფერი ისე, როგორც დაგეგმილია, ჩვენი აზრით, ეს შესაძლებელია რომ 2023-2024 წლისთვის ამ მოდელზე გადავიდეთ", — განაცხადა მინისტრის მოადგილემ.

შეფასებისა და გამოცდების ეროვნული ცენტრის დირექტორი, სოფო გორგოძე ამბობს, რომ მთავარი ყურადღება არა გამოცდებზე, არამედ თავად სკოლაზე უნდა იყოს გადატანილი.

"ჩვენ გვინდა, რომ შევცვალოთ ეს ორიენტაცია და აქცენტები გამოცდებზე კი არ გავაკეთოთ, სკოლაზე. მოდით გავაძლიეროთ მასწავლებლები, მოდით დავეხმაროთ რომ თვითონ შეაფასოს უკეთესად", — განაცხადა შეფასებისა და გამოცდების ეროვნული ცენტრის დირექტორმა, სოფო გორგოძემ.

სასკოლო და ეროვნული საგამოცდო სისტემა იცვლება. 2020 წლიდან ზოგადი უნარები სავალდებულო აღარ იქნება, ხოლო მე-11 და მე-12 კლასელები სკოლის გამოსაშვებ გამოცდეს აღარ ჩააბარებენ. განათლების სამინისტროს განმარტებით, გამოცდები ე.წ. CAT-ის სისტემით არაეფექტური იყო. მინისტრს მოლოდინი აქვს, რომ მოსწავლეები სკოლებში გამოცდების გარეშე უკეთ ისწავლიან.

ახალი რეფორმით შეფასების ტვირთი სკოლაზე გადადის. ატესტატს მოსწავლეები მხოლოდ პედაგოგების შეფასებების საფუძველზე მიიღებენ. ჰუმანიტარული და ტექნიკური მიმართულების აბიტურიენტები კი მესამე საგნად ზოგადი უნარების ნაცვლად მათემატიკასა და ქართულს ჩააბარებენ, იმის მიხედვით, თუ რომელი მიმართულებით აგრძელებენ სწავლას. უნივერსიტეტები ჩასაბარებელი საგნების ბარიერების დადგენას დამოუკიდებლად შეძლებენ. ასევე მათი გადასაწყვეტი იქნება, შეიტანენ თუ არა არჩევითი საგნების სიაში ზოგად უნარებს.

ამავე თემაზე: