გაერთიანებული ოპოზიციის ყოფილმა საპრეზიდენტო კანდიდატმა, გრიგოლ ვაშაძემ ლიეჟში "თანამემამულეთა მსოფლიო კრების" დაწყებამდე განაცხადა, რომ კარგია თუ მოწინააღმდეგეებს კრებაზე არ უშვებენ. მისი თქმით, მომხდარ ინციდენტზე ინფორმაცია არ აქვს და ვისაც განსხვავებული აზრის გამოთქმა სურს "ბიძინასთან ჩავიდნენ".

"აქ მაინც დაგვალაპარაკეთ მშვიდად კაცო. ყელში ამოვიდა ეს თქვენი განსხვავებული აზრი. ვიცი მე თქვენი... ეს პარტიული შეკრება არ არის, ეს არის პატრიოტების შეკრება", — განაცხადა ვაშაძემ პირველი არხის კითხვის პასუხად.

ლიეჟში "თანამემამულეთა მსოფლიო კრება" დაიწყო. კრების იდეა ექსპრეზიდენტ მიხეილ სააკაშვილს ეკუთვნის, რომელმაც მოძრაობა "ერთად სახლში" ჩამოაყალიბა. მოძრაობის მიზანი ემიგრანტებთან ერთად საქართველოში დაბრუნებაა და ემიგრანტების შემოწირულობით ფუნქციონირებს.

"თანამემამულეთა მსოფლიო კრება" და დაპირისპირება ლიეჟში

კონგრესის სასახლესთან სადაც "თანამემამულეთა მსოფლიო კრება" მიმდინარეობს ექსპრეზიდენტის საწინააღმდეგო აქცია იმართება. შეკრებილებმა განაცხადეს, რომ რომ ისინიც ემიგრანტები არიან და სააკაშვილს მათი სახელით საუბრის უფლება არ აქვს.

კონგრესის სასახლესთან ფიზიკური დაპირისპირებაც მოხდა, როცა სააკაშვილის მოწინააღმდეგეთა ნაწილმა შენობაში შესვლა სცადა, თუმცა ორგანიზატორებმა მათ პროვოკატორები უწოდეს და შესვლის უფლება არ მისცეს. დაპირისპირებისას გამოიყენეს, სავარაუდოდ, წიწაკის სპრეი. შეხვედრის დაწყებამდე ორგანიზატორი გიორგი სიგუა აცხადებდა, რომ აქვთ ინფორმაცია მოსალოდნელი პროვოკაციების შესახებ.

აქციის მონაწილეების თქმით, მათ სურდათ კითხვები დაესვათ სააკაშვილისთვის, თუმცა ეს "სექტის შეკრებაა" და განსხვავებული აზრის მოსმენა არ სურთ. ამიტომ მათ ბანერები გაშალეს და შენობის გარეთ აქცია გამართეს.

აქციის მონაწილეებს აქვთ მოძრაობა არა ნაციზმის საპროტესტო ბანერები. ეს მოძრაობა საქართველოში წინასაარჩევნო პეროდში ჩამოყალიბდა.