ბელგიის ქალაქ ლიეჟში, კონგრესის სასახლეში, სადაც სააკაშვილის მხარდამჭერი ემიგრანტების შეკრება უნდა გაიმართოს სიტყვიერი და ფიზიკური დაპირისპირება მოხდა. რამდენიმე პირი, რომელსაც ხელში საააკაშვილის საწინააღმდეგო ტრანსპარანტები ეჭირა დარბაზში შესვლის უფლებას ითხოვდა, თუმცა დაცვამ ისინი არ გაატარა. შეხვედრის ორგანიზატორები აცხადებდნენ, რომ ისინი პროვოკატორები არიან და ამიტომ არ აძლევდნენ მათ დარბაზში შესვლის უფლებას.

პირველი არხის კადრებში ჩანს, რომ სიტყვიერი კამათი ფიზიკურ დაპირისპირებაში გადაიზარდა. პირველი არხის ჟურანლისტის თქმით, ნაციონალური მოძრაობის მხარდამჭერებმა წიწაკის სპრეი გამოიყენეს, რის შემდეგაც კონგრესის სასახლის ფოიე მოწინააღმედგეებმა დატოვეს, შესასვლელი კარი კი ორგანიზატორებმა ჩაკეტეს. შეხვედრის დაწყებამდე ორგანიზატორი გიორგი სიგუა აცხადებდა, რომ აქვთ ინფორმაცია მოსალოდნელი პროვოკაციების შესახებ.

ფოტო: კადრები ვიდეოდან / პირველი არხი

ლიეჟში თბილისის დროით ცხრა საათზე "თანამემამულეთა მსოფლიო კრება" დაიწყება. კრების იდეა ექსპრეზიდენტ მიხეილ საააკშვილს ეკუთვნის, რომელმაც მოძრაობა "ერთად სახლში" ჩამოაყალიბა. მოძრაობა ემიგრანტების შემოწირულობით ფუნქციონირებს.

თანამემამულეთა მსოფლიო კრებაზე 5 პუნქტიან გეგმას განიხილავენ, რომლის მიხედვითაც საქართველოს ეკონომიკა უნდა გაძლიერდეს და ემიგრანტები ქვეყანაში დაბრუნდნენ.