საქართველოში ქვეითად მოსიარულეებისთვის რთულია ცხოვრება. აქ ჯანმრთელობის შესანარჩუნებლად უფრო მეტი სიფრთხილე და ყურადღება გჭირდება, ვიდრე ნებისმიერ სხვა ქვეყანაში. ახალი არავისთვისაა, რომ ზებრაზე გადასვლის წესი აქ საერთოდ არ მოქმედებს და არც წითელ შუქზე გადასვლისას ვართ მაინც და მაინც დაცულები.

აქედან გამომდინარე, ყველა ქვეითად მოსიარულეს ავტომობილების მძღოლებთან სათქმელი და თხოვნა დაგვიგროვდა.

1. იარეთ დაშვებული სიჩქარით

დიახ, იარეთ იმ სიჩქარით, რომელიც დაშვებულია. არ შეიძლება იმ კანონის უგულებელყოფა, რომელიც სიჩქარის ლიმიტს აწესებს. იცით რატომ? - პირველ რიგში იმიტომ, რომ საკუთარ თავსაც და თქვენს გარშემო მყოფებსაც დიდ საფრთხეს უქმნით. მეორე მიზეზი კი ისაა, რომ ხშირად ქვეითად მოსიარულეებიც ცუდად ვიქცევით და გზის იმ ნაწილზე გადავდივართ, სადაც დაშვებული არაა.

აქ შენიშვნა ქვეითებსაც გვეკუთვნის - გზის მეორე მხარეს გადავიდეთ მხოლოდ იქ, სადაც შუქნიშანი, ზებრა ან მიწისქვეშა გადასასვლელია. ასე თუ მოვიქცევით, გადარჩენის შანსები გაცილებით მეტი გვექნება.

2. დაგვითმეთ გზა ზებრა გადასასვლელზე

მთელი განვითარებული სამყარო ასე ცხოვრობს: ქვეითებს სპეციალურ გადასასვლელ ზონებში გზას უთმობენ, თანაც უპრობლემოდ. ამაში არაფერია რთული და არც დიდ დროს წაგართმევთ, მაქსიმუმ ერთი წუთი დაკარგოთ. სამაგიეროდ, ამ ერთ წუთში, დიდი შანსია, რომ ქვეითების სიცოცხლე გადაარჩინოთ.

მართლა, არაფერია ამაში რთული, გვერწმუნეთ. თუ დაგვითმობთ, გულითად მადლობასაც გადაგიხდით, რადგან ასეთი საქციელი საქართველოში ქვეითებს იშვიათად გვახსენდება.

3. ზებრაზე თუ დაგვითმობთ, ნუ დაგვისიგნალებთ

თუ მოხდა ისე, რომ ზებრა გადასასვლელზე გზა დაგვითმეთ, გთხოვთ, ნუ გვაიძულებთ სირბილს და გაბმულად ნუ გვისიგნალებთ. როგორც წესი, ზებრა ისეთ ზონებშია დახაზული, სადაც ავტომობილის გაჩერება რამდენიმე წამით, პრობლემას არ წარმოადგენს.

მაშინ, როცა გაბმული სიგნალი გვესმის, ქვეითები ვღელავთ, თავს არაკომფორტულად ვგრძნობთ და იძულებულები ვხდებით ვირბინოთ. ეს კი, სიმართლე ვთქვათ, სულაც არ არის თქვენგან კარგი ჟესტი. ბოლოს და ბოლოს, თქვენ კომფორტულად გადაადგილდებით, ჩვენ კი კილომეტრების გავლა ფეხით გვიწევს.

4. ნუ დააყენებთ მანქანას ტროტუარსა და ზებრაზე

ტროტუარი არის სპეციალური ადგილი ქვეითებისთვის, სადაც მხოლოდ ფეხით გადაადგილებაა დაშვებული. იქ, სადაც მანქანის პარკირების ზონებია, შეგიძლიათ გაჩერდეთ, მაგრამ იმ ვიწრო ადგილებს თქვენი ავტომობილებით ნუ დაიკავებთ, სადაც ისედაც მინიმალური შანსი გვაქვს, რომ უსაფრთხოდ ვიაროთ.

კიდევ ერთი პრობლემაა ზებრაზე გაჩერება. ანუ იქ, სადაც ქვეითები გზას კვეთენ, ავოტომობილის გაჩერება არ შეიძლება. ასეთ დროს, ქვეითები იძულებულები ვხდებით, თქვენს მანქანას გვერდი ავუაროთ და გზაზე განვაგრძოთ სიარული, რაც დიდ საფრთხეს გვიქმნის.

5. შეწყვიტეთ გაუჩერებელი სიგნალი!

მართლაც, შეწყვიტეთ საცობით გადატვირთულ გზაზე სიგნალები. ხმა, რომელსაც სიგნალის დროს მანქანა გამოსცემს, ისედაც ძალიან სტრესულია და მითუმეტეს მაშინ, როცა ამას ასობით ავტომობილი ერთდროულად აკეთებს.

ამ სიტუაციას კიდევ უფრო ამძიმებს ის ფაქტი, რომ სიგნალები ვერაფრით ცვლის რეალობას. მანქანა, რომელიც თქვენს წინ დგას, ზუსტად ისეთივე მდგომარეობაშია საცობში, როგორც თქვენ. სიგნალის გამოყენება დასაშვებია მხოლოდ იმ შემთხვევაში, როცა ის მყისიერი საფრთხის არიდებას ემსახურება.

თუ შეამცირებთ ამ შესაძლებლობის გამოყენებას, ოდნავ უკეთესი ქვეყანა გავხდებით, მართლა.

6. ავტომობილში მუსიკის მოსმენა და ხმოვანი სისტემის დემონსტრირება, ცუდი საქციელია

ეს საკითხი განსაკუთრებულად იმ მძღოლებს ეხებათ, რომლებიც გაჩერებულ მანქანაში უსმენენ სიმღერას, ხმას კი ბოლომდე უწევენ და მთელ ქუჩას აიძულებენ იმავე მუსიკალური ნაწარმოების აკვიატებას. ამ დროს შეიძლება ვიღაც ბავშვს აძინებდეს, ვიღაც მუშაობდეს, ვიღაც კი გლოვობდეს.

ასე ნუ მოიქცევით, რადგან დარწმუნებული იყავით, ყველა წუხდება. ჩვენ კი საზოგადოება ვართ და ერთმანეთს პატივი უნდა ვცეთ, არა?!

7. პატივი ეცით საგზაო ნიშნებს, ეს აუცილებელია

ეს მოწოდება ქვეითებსაც თანაბრად გვეხება. იქ, სადაც მინიშნებულია, რომ გაჩერება არ შეიძლება, ნუ გაჩერდებით. სადაც ნიშანი გკარნახობთ, რომ ქვეითების გადასასვლელია, დაგვითმეთ გზა, ხოლო იქ, სადაც ნიშანი კატეგორიულად გაფრთხილებთ, რომ სიჩქარეს არ უნდა გადააჭარბოთ, თავი შეიკავეთ.

ამ რჩევების გათვალისწინება დაგვეხმარება საზოგადოებას, რომ უფრო უსაფრთხო ქვეყანაში ვიცხოვროთ და ფეხით სიარულის არ გვეშინოდეს. თანაც, მძღოლებიც დაიცავთ საკუთარ თავს როგორც სხვისთვის, ისე საკუთარი თავისთვის ზიანის მიყენებისგან.

მოძრაობის უსაფრთხოებაზე ისაუბრეს რუსთავი 2-ის გადაცემაში სხვა შუადღე, რომელშიც ავთო გვასალიამ ქუთაისი მოინახულა და საგზაო უსაფრთხოებაზე მოამზადა რეპორტაჟი.