საერთაშორისო ორგანიზაცია ფრიდომ ჰაუსში აცხადებენ, რომ საქართველოს მთავრობის კრიტიკა მათი გამოქვეყნებული ანგარიშის მიმართ უსამართლოა. ამერიკის ხმასთან ინტერვიუში, ორგანიზაციის ევროპისა და ევრაზიის პროგრამების დირექტორი, მარკ ბერენტი ამბობს, რომ საქართველო, როგორც რეგიონში წარმატებული ქვეყანა, უფრო უკეთ უნდა უმკლავდებოდეს კრიტიკას.

"ყოველთვის, როცა ასეთ ანგარიშს აკეთებ, მუდმივად არის მსგავსი გამოწვევები მეორე მხარისგან და ესეც ერთ-ერთი ასეთი შემთხვევაა", — ამბობს ბერენტი. მისივე თქმით, მათი მეთოდოლოგია და ანგარიშის შედგენის პროცესი გამჭირვალე და ყველასთვის ხელმისაწვდომია.

"დემოკრატიის უკუსვლა" ასე ჰქვია ფრიდომ ჰაუსის 2018 წლის ანგარიშს, რომელშიც 200-ზე მეტ ქვეყანასა და ტერიტორიაზე დემოკრატიისა და სამოქალაქო უფლებების მდგომარეობაა შეფასებული. საქართველო ამ ანგარიშის თანახმად, "ნახევრად თავისუფალი" ქვეყნების სიაში დარჩა და წინა წელთან შედარებით ერთი პოზიციით უკან დაიხია.

7 თებერვალს ამერიკის ხმასთან ინტერვიუში ბენეტმა განაცხადა, რომ რეიტინგის შემცირება პირველ ყოვლისა, უკავშირდებოდა საპრეზიდენტო არჩევნებს. მისი თქმით, არსებობდა სანდო ბრალდებები, რომ ხდებოდა ამომრჩეველთა მოსყიდვა და ადმინისტრაციული რესურსის გამოყენება.

მმართველ გუნდში განაცხადეს, რომ ბრალდებები უსაფუძვლოა. ქვენის საგარეო საქმეთა მინისტრმა, დავით ზალკალიანმა პასუხად ფრიდომ ჰაუსის შარშანდელ ანგარიშში დაშვებული შეცდომები გაიხსენა, რომელიც ორგანიზაციამ მიმართვის შემდეგ გაასწორა. მმართველი პარტიის გენერალურმა მდივანმა, კახა კალაძემ კი განაცხადა, რომ საქართველოში თავისუფლებისა და გამოხატვის პრობლემა არ არსებობს და შენიშვნის მიცემა ამ მიმართულებით არასწორი ჰგონია.

ფრიდომ ჰაუსი ნაციონალური მოძრაობის იდეების გატარებაშიც დაადანაშაულეს.

"ეს არის არაკორექტული შეფასება ქვეყანაში მიმდინარე პროცესების და რაღაც აყოლა იმ რიტორიკის, რომელიც ჩვენთვის ყველასთვის კარგად ცნობილ ოპოზიციურ, დესტრუქციულ ძალას აქვს", — აღნიშნა ქართული ოცნების დეპუტატმა, აკაკი ზოიძემ ტელეკომპანია იმედთან ინტერვიუში.