საფრანგეთმა რომიდან თავისი ელჩი მოლაპარაკებებისთვის გაიწვია. მიზეზი კი ბოლო თვეებში იტალიელი პოლიტიკოსების მხრიდან "უსაფუძვლო" ვერბალური კრიტიკა გახდა.

"რამდენიმე თვის განმავლობაში საფრანგეთი აღმაშფოთებელი და უსაფუძვლო განცხადებების მიზანი გახდა", — აღნიშნულია ქვეყნის საგარეო საქმეთა სამინისტროს განცხადებაში. მათივე თქმით, მსგავსი პრეცედენტი მეორე მსოფლიო ომის შემდეგ არ ყოფილა.

იტალიის პრემიერი-მინისტრის ორმა მოადგილემ, მატეო სალვინიმ და ლუიჯი დი მაიომ გააკრიტიკეს საფრანგეთის პრეზიდენტი, ემანუელ მაკრონი სხვადასხვა საკითხის გამო, მათ შორის იმიგრაციისა და ე.წ. ყვითელჟილეტიანების დემონსტრაციების გამო.

ამ კვირაში დი მაიო ე.წ. ყვითელჟილეტიანების ლიდერს შეხვდა და აღნიშნა, რომ "ცვლილებების ქარმა ალპები გადაკვეთა". საფრანგეთმა აღნიშნული განცხადება პროვოკაციად შეაფასა.