მაკედონია თავისი ახალი სახელწოდებით, ჩრდილოეთ მაკედონია 6 თებერვალს ჩრდილოატლანტიკურ ალიანსში გაწევრიანების პროტოკოლს ხელს მოაწერს. NATO-ს გენერალურმა მდივანმა, იენს სტოლტენბერგმა ტვიტერზე დაწერა, რომ ოთხშაბათს "ისტორია დაიწერება".

იუგოსლავიის დაშლის შემდეგ მაკედონიის დასახელების გამო დავა 27 წლის განმავლობაში გაგრძელდა. ეს აფერხებდა ნატოსა და ევროკავშირში მაკედონიის გაწევრიანებას, რადგან საბერძნეთი მოლაპარაკებებს ბლოკავდა.

ბერძნები აპროტესტებდნენ იმას, რომ მეზობელ ქვეყანასა და საბერძნეთის ჩრდილოეთით უძველეს ისტორიულ რეგიონს ერთი სახელი ჰქონოდათ. ისინი სავარაუდო ტერიტორიულ დავებს ერიდებოდნენ.

27-წლიანი დავა კი საბოლოოდ ისტორიული შეთანხმებით დასრულდა. საბერძნეთის და მაკედონიის პრემიერ-მინისტრებმა ქვეყნის სახელის ცვლილებასთან დაკავშირებით შეთანხმება 2018 წლის ივნისში გააფორმეს. მაკედონიისთვის სახელის ცვლილების შეთანხმებას მიესალმება გაერო, ევროკავშირი, აშშ და ნატო.

საბერძნეთის პარლამენტმა მაკედონიის სახელის ცვლილებას მხარი 25 იანვარს დაუჭირა. მანამდე კი იმავე ცვლილებას მაკედონიაში დაუჭირეს მხარი. ახლა ოფიციალურად მაკედონიას ჩრდილოეთ მაკედონია ჰქვია.