საზოგადოებრივი მაუწყებლის გენერალურმა დირექტორმა, ვასილ მაღლაფერიძემ სამეურვეო საბჭოსთან შეხვედრისას არხის სავალალო მდგომარეობაზე გაამახვილა ყურადღება. სხდომა 28 იანვარს გაიმართა.

მაუწყებლის მდგომარეობაზე დირექტორმა საბჭოს წევრის, ქეთევან მსხილაძის რეპლიკაზე პასუხის გაცემის დროს ისაუბრა. მსხილაძე მიიჩნევს, რომ მენეჯმენტმა ბათუმში სტუდიისთვის სივრცე, რომლის გაყიდვაც ახლა იგეგმება, დაახლოებით 1,5 წლის წინ გაუაზრებლად იყიდა.

"ის ბორდი იმ [მხოლოდ ნიუსრუმის აშენების] გადაწყვეტილებას იმიტომ იღებდა, რომ მეტის საშუალება არ იყო, არავინ ამას კრედიტს არ აძლევდა, ამიტომ შენდებოდა მხოლოდ ნიუსრუმი 300 ადამიანზე... ამაში არ შედიოდა არაფერი, ტელევიზია რჩებოდა ან იფუნქციონირებდა, ან არ იფუნქციონირებდა. ამ წუთში ტელევიზია დგას ცალ ფეხზე, არ მუშაობს სერვერები და ა.შ." — აღნიშნა მაღლაფერიძემ.

მისი თქმით, 2019 წელს ფაქტობრივად ახალი ტელევიზია იქმნება.

საზოგადოებრივი მაუწყებლის ყოველწლიური ბიუჯეტი რამდენიმე მილიონით აღემატება სხვა კომერციული არხების ბიუჯეტს. 2019 წლის ეს თანხა დაახლოებით 50 მილიონი ლარია. გარდა ამისა, შენობის ასაშენებლად არხმა აიღო 45 მილიონიანი სესხი.