მცხეთის ჯვრის მონასტერთან გარემოვაჭრეებს დახლების გახსნის უფლებას ისევ არ აძლევენ. ადგილზე მობილიზებულია პოლიციის ეკიპაჟი.

On.ge-სთან საუბარში გარემოვაჭრეები აცხადებენ, რომ დახლებს მესამე დღეა ვერ ხსნიან. მათი თქმით, 25 იანვარს, სამუშაო დღის დასასრულს საპატრულო პოლიცია ამოვიდა და დახლებს ფოტოები გადაუღო, რის შემდეგაც განუცხადეს, რომ ვაჭრობა უნდა შეეწყვიტათ და დახლები აღარ გაეხსნათ. მათივე თქმით, ამ წუთებში საპატრიარქოში მოლაპარაკებების დასრულებას ელოდებიან, რის შემდეგაც მათ, სავარაუდოდ, გზიდან 15 მეტრის დაშორებით გამოუყოფენ სავაჭრო ადგილს.

მონასტერთან დილის 9 საათიდან იკრიბებიან ტურისტები. რამდენიმე მათგანმა იქვე მყოფ ტაქსის მძღოლებს ჰკითხა, შესაძლებელია თუ არა სადმე სამახსოვრო სუვენირების შეძენა, რაზეც უარყოფითი პასუხი მიიღეს.

უკრაინიდან ჩამოსულმა ტურისტმა, მაშა მატვეენკომ On.ge-სთან საუბარში აღნიშნა, რომ უკვე შეიძინა ალავერდისა და სვეტიცხოვლის ტაძრის მაკეტი და სურვილი ჰქონდა ჯვრის მონასტერიც შემატებოდა მის კოლექციას, თუმცა არ გაუმართლა. მაშა ამბობს, რომ მოუხერხებელია, როცა ქალაქის ცენტრიდან დაშორებულ ტურისტულ სივრცესთან ახლოს არ დგას ჯიხური, სადაც წყლის ან წვენის შეძენა იქნება შესაძლებელი.

თურქეთიდან ჩამოსული ტურისტი იაფან იულუზბაი კი აცხადებს, რომ ცოლისთვის საჩუქრად თექისაგან დამზადებული კაშნეს წაღება სურდა, თუმცა სვეტიცხოველთან არ იყიდა იმის იმედად, რომ აქ დახვდებოდა. იაფანი ამბობს, რომ ჯვრის მონასტერში ხშირად მიდის და დახურული დახლები აქამდე არ უნახავს.

მონასტერს სტუმრობდა სომხეთიდან ჩამოსული ტურისტების ჯგუფიც. როდესაც მათ სუვენირების შეძენის სურვილის გამოთქვეს ადგილობრივმა გიდმა განუცხადა, რომ მერია სავაჭრო სივრცეს არემონტებდა და სწორედ ამიტომ არ დახვდათ მათ ადგილზე დახლები.

გარევაჭრობის გამო მცხეთის ჯვრის მონასტრის კარები ვიზიტორებისთვის 14 იანვარს დროებით დაიკეტა. გადაწყვეტილება ტაძრის წინამძღვარმა, კონსტანტინე ჯინჭარაულმა მიიღო. წინამძღვრის განმარტებით, ტაძრის დაკეტვის მიზეზი მოუწესრიგებელი გარევაჭრობა გახდა, რომელიც "გარემოს ამახინჯებდა და შეუფერებელ სიტუაციას ქმნიდა".

კონსტანტინე ჭინჭარაულს დაეთანხმა საპატრიარქოც. მათ განცხადება გაავრცელეს, სადაც ეწერა, რომ "ხალხის გაჭირვება ესმით, თუმცა ამდენი ტურისტის ფონზე მოუწესრიგებელი გარემო უხერხულია".

გარემოვაჭრეები On.ge-სთან ყვებიან, რომ მას შემდეგ, რაც მონასტრის წინამძღვარმა პრეტენზია გამოთქვა და ტაძარი ჩაკეტა, მათ გზის სავალი ნაწილი დატოვეს და ჯებირებს უკან გადაინაცვლეს. რამდენიმე დღეში მათ უფრო უკან დახევა მოსთხოვეს და დახლები დაახლოებით 5-10 მეტრის დაშორებით გადაატანინეს, თუმცა გახსნის უფლება მაინც არ მისცეს. გარემოვაჭრეების ცნობით, წინანმძღვარი სთავაზობს სივრცეს გზიდან 200 მეტრის დაშორებით, რომელსაც თავისი საქონლისთვის საძოვრად იყენებს. მათივე თქმით, ამ ტერიტორიაზე ტურისტები არ ჩავლენ და მათ მუშაობას აზრი არ ექნება. მცხეთის ჯვრის მონასტრის გარემოვაჭრეები საპროტესტო აქციებს აანონსებენ და წინამძღვართან შეხვედრას გეგმავენ. თუმცა, ამბობენ, რომ ბევრი მცდელობის მიუხედავად წინამძღვარი მათ არ ხვდება.