გარევაჭრობის გამო მცხეთის ჯვრის მონასტრის კარები ვიზიტორებისთვის დროებით დაიკეტა. როგორც რუსთავი 2 წერს, გადაწყვეტილება ამის შესახებ ტაძრის წინამძღვარმა, კონსტანტინე ჯინჭარაულმა მიიღო.

საპატრიარქოს პრესსამსახურის ხელმძღვანელმა, დეკანოზ ანდრია ჯაღმაიძემ On.ge-ს უთხრა, რომ ტაძრის დაკეტვის მიზეზი მოუწესრიგებელი გარევაჭრობა გახდა, რომელიც "გარემოს ამახინჯებდა და შეუფერებელ სიტუაციას ქმნიდა".

"მონასტრის წინამძღვარი გარკვეული პერიოდის განმავლობაში ცდილობდა, რომ მიეღო დახმარება მუნიციპალიტეტისგან, რათა შესაბამისი ზომები გატარებულიყო. ბევრი მცდელობის შემდგომ ასეთი გადაწყვეტილება მიიღეს", — აღნიშნა დეკანოზმა და დაამატა, რომ მისთვის უცნობია როდის შეძლებენ ვიზიტორები ტაძარში შესვლას.

მცხეთის ჯვრის მონასტერი VI საუკუნის კულტურული ძეგლია, რომელიც ტურისტებს შორის დიდი პოპულარობით სარგებლობს. ის მსოფლიო კულტურული მემკვიდრეობის ძეგლთა სიაში არის შეტანილი.