დღეს, 26 აპრილს, აუდიტორია 115-ის წევრებმა საერთაშორისო გამჭვირვალობა საქართველოს წარმომადგენლებს მათ ოჯახებზე ძალოვანი უწყებების მხრიდან განხორციელებულ ზეწოლაზე ინფორმაცია მიაწოდეს. მათი თქმით, სულ 15 სტუდენტია ისეთი, ვის ოჯახსაც პოლიცია ავიწროვებს. TI სტუდენტური მოძრაობის წარმომადგენლებს იურიუდიულ დახმარებას დაპირდა:

აუდიტორია 115-ის წევრის, გიორგი არობელიძის განმარტებით, TI-ის სტუდენტებმა იმ შევიწროვების ფაქტებზე უამბეს, რომლებიც საზოგადოებითვის უკვე ცნობილია:

"ასევე, ვისაუბრეთ უნივერსიტეტებში ე.წ. ოდეერების არსებობაზე. მათ გვითხრეს, რომ საჭიროების შემთხვევაში, ყოველთვის მზად იქნებიან იმისთვის, რომ იურიდიულად დაგვეხმარონ".

არობელიძის თქმით, ძალოვანი უწყებების მხრიდან სტუდენტების ოჯახებზე განხორციელებული ძალადობის ერთ-ერთი მაგალითია, როდესაც მათი მოძრაობის წევრის მამას, რომელიც მუნიციპალიტეტში მუშაობს, უთხრეს, რომ თუ მისი შვილი არ დაანებებდა თავს აუდიტორია 115-ს, მაშინ მას გათავისუფლდებოდა სამსახურიდან.

სტუდენტური მოძრაობის წევრებმა ძალოვანი უწყებების მხრიდან მათი ახლობლების შევიწროვების ფაქტებზე მარტში, მათი საპროტესტო მსვლელობების ფონზე, დაიწყეს საუბარი. როგორც თავად ამბობენ, აუდიტორია 115-ის წარმომადგენლებს შორის ბევრია ისეთი, ვინც აღნიშნული ზეწოლის გამო უკვე მიმართა ომბუდსმენს, თუმცა ამაზე ღიად ვერ საუბრობს, რადგან ძალოვანი უწყებების მხრიდან ზეწოლის ეშინია.