სამუშაო ჯგუფის შეხვედრის შემდეგ პარლამენტის თავმჯდომარე ირაკლი კობახიძემ განაცხადა, რომ გადაწყვეტილებებს დღეს ვერ გამოაცხადებენ, რადგან მხოლოდ პრინციპების დონეზე ისაუბრეს. მისივე თქმით, მეორე შეხვედრაზე გადაწყვეტილებების დეტალურად წარმოდგენას შეძლებენ.

დღეს, 27 იანვარს უზენაეს სასამართლოში მოსამართლეების შერჩევასთან დაკავშირებით სამუშაო ჯგუფის პირველი შეხვედრა გაიმართა, რომელსაც იუსტიციის საბჭო, მმართველი გუნდის წევრები და ოპოზიციის წარმომადგენლები ესწრებოდნენ. შეხვედრა პროტესტის ნიშნად ევროპულმა საქართველომ, ნაციონალურმა მოძრაობამ და იუსტიციის საბჭოს არამოსამართლე წევრებმა, ანა დოლიძემ და ნაზი ჯანეზაშვილმა დატოვეს. სამუშაო ჯგუფს ბოიკოტი გამოუცხადეს არასამთავრობო ორგანიზაციებმაც.

"რაც შეეხება ორ არამოსამართლე წევრს და, ასევე, ოპოზიციის წარმომადგენლებს, მათ ისურვეს შემადგენლობის შეცვლა. ჩვენ ამასთან დაკავშირებით დავაფიქსირეთ ღია პოზიცია, ჩვენ მზად ვართ, კონსულტაციებისთვის. მე დავაზუსტებ, შევთავაზეთ არასამთავრობო ორგანიზაციებს მონაწილეობა მიეღოთ მუშაობაში, თუმცა მათ ბოიკოტი გამოუცხადეს სხდომას", — განაცხადა პარლამენტის თავმჯდომარემ.

შეხვედრის პარალელურად არასამთავრობოებმა და მოქალაქეებმა საპროტესტო აქცია გამართეს. მათი ერთ-ერთი მოთხოვნა სისტემიდან მურუსიძე-ჩინჩალაძის კლანისა და იუსტიციის უმაღლესი საბჭოდან მურუსიძის უვადოდ დამნიშვნელი წევრების წასვლაა. გარდა ამისა, ისინი იუსტიციის საბჭოს დაშლას ითხოვენ.

ამავე თემაზე: