თბილისის სააპელაციო სასამართლოს უვადო მოსამართლის, თამარ ალანიას თქმით, მოსამართლეების უვადოდ დანიშვნის შეჩერების მოსაზრება გაუგებარია. მისი განმარტებით, სასამართლო კორპუსის გაძლიერებისთვის მოსამართლეთა რაოდენობა უნდა გაიზარდოს და ამას საერთაშორისო ანგარიშებიც ადასტურებს.

"ეს ერთმანეთთან შეუთავსებელი ფაქტორებია. ამასთან, არ არსებობს არანაირი სხვა სამართლებრივი საფუძველი და პროცედურა თუ როგორ და რა საფუძველით შეიძლება, ეს განხორციელდეს", — განაცხადა თამარ ალანიამ.

ქართული ოცნების წევრების ნაწილი ითხოვს, რომ მოსამართლეების უვადოდ დანიშვნა 2024 წლამდე შეჩერდეს. აღნიშნული საკითხი დეპუტატებმა მმართველი გუნდის შეხვედრაზე განიხილეს. როგორც დეპუტატმა ლევან გოგიჩაიშვილმა თქვა, ამის საშუალებას კონსტიტუციური ჩანაწერი აძლევთ. მოსამართლეების უვადოდ დანიშვნის შეჩერებას ემხრობიან იუსტიციის საბჭოს არამოსამართლე წევრები ანა დოლიძე და ნაზი ჯანეზაშვილი.

დღეს, 27 იანვარს პარლამენტის თავმჯდომარის, ირაკლი კობახიძის ხელმძღვანელობით უზენაეს სასამართლოში მოსამართლეების შერჩევის წესსა და კრიტერიუმებთან დაკავშირებით მმართველი გუნდის წევრები ოპოზიციისა და იუსტიციის საბჭოს წევრებს შეხვდნენ. შეხვედრაში მონაწილეობაზე უარი თქვა არასამთავრობო ორგანიზაციების ნაწილმა.

სამუშაო ჯგუფის შეხვედრა პროტესტის ნიშნად ერთიანმა ნაციონალურმა მოძრაობამ, ანა დოლიძემ და ნაზი ჯანეზაშვილმა დატოვეს. ისინი სამუშაო შეხვედრის ფორმატს ეწინააღმდეგებიან. საბჭოს მოსამართლე წევრს, დიმიტრი გვრიტიშვილს მიაჩნია, რომ ჯანეზაშვილისა და დოლიძის მიზანი შეხვედრის ჩაშლა იყო.

არასამთავრობოებმა მოქალაქეებთან ერთად შეხვედრის პარალელურად სასამართლო სისტემაში რეალური ცვლილებების მოთხოვნით საპროტესტო აქცია გამართეს. მათი ერთ-ერთი მოთხოვნა სისტემიდან მურუსიძე-ჩინჩალაძის კლანისა და იუსტიციის უმაღლესი საბჭოდან მურუსიძის უვადოდ დამნიშვნელი წევრების წასვლაა. გარდა ამისა, ისინი იუსტიციის საბჭოს დაშლას ითხოვენ.