კოალიცია მედიის ადვოკატირებისთვის რუსთავი 2-ის ჟურნალისტ დავით ერაძის სახლზე თავდასხმას ეხმაურება. ათი ორგანიზაციის საერთო განცხადებაში აღნიშნულია, რომ უნდა დადგინდეს უკავშირდებოდა თუ არა თავდასხმა ჟურნალისტის საქმიანობას და საქმეს შესაბამისი კვალიფიკაცია მიენიჭოს.

"კოალიცია, მსგავსი შემთხვევების პრევენციის მიზნით, მოუწოდებს საგამოძიებო ორგანოებს სწრაფად, ჯეროვნად და სრულყოფილად მოხდეს აღნიშნული ფაქტის გამოძიება", — ნათქვამია განცხადებაში.

25 იანვარს ჟურნალისტ დავით ერაძის სახლს ესროლეს. შინაგან საქმეთა სამინისტრომ გამოძიება 236-ე მუხლით დაიწყო, რაც ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენას, შენახვას, ტარებას, დამზადებას, გადაზიდვას, გადაგზავნას ან გასაღებას გულისხმობს. ტელეკომპანია

რუსთავი 2-ის ინფორმაციით, დავით ერაძის ერთ-ერთი ბოლო სიუჟეტი მოჭიდავეების საქმის სკანდალს ეხებოდა. სწორედ დავით ერაძემ მოიპოვა ვიდეო-მასალა, რომელიც ევროპის ჩემპიონსა და ფედერაციის პრეზიდენტს შორის კონფლიქტს ასახავს, კადრებში ჩანდა, როგორ გაუსწორდა გეგა გეგეშიძე ევროპის ჩემპიონს. სიუჟეტის ეთერი გასვლის შემდეგ სამართალდამცველებმა გეგა გეგეშიძე დააპატიმრეს.

კოალიციის განცხადებას ათი ორგანიზაცია აწერს ხელს:

  • საქართველოს ახალგაზრდა იურისტთა ასოციაცია;
  • მედიაკლუბი;
  • საქართველოს ჟურნალისტური ეთიკის ქარტია;
  • ინფორმაციის თავისუფლების განვითარების ინსტიტუტი;
  • ფონდი ღია საზოგადოება — საქართველო;
  • რეგიონულ მაუწყებელელთა ალიანსი;
  • ლიბერალური აკადემია თბილისი;
  • საქართველოს რეგიონული მედიის ასოციაცია;
  • სატელევიზიო ქსელი;
  • საქართველოს მცირე და საშუალო სატელეკომუნიკაციო ოპერატორთა ასოციაცია;