თბილისის მერიასთან მიღწეული შეთანხმების შემდეგ სასტუმრო ბუდაპეშტის დამფუძნებელმა გოგა ზაქაიძემ განაცხადა, რომ მნიშვნელობა არ აქვს "ბიზნესს სად გააკეთებენ".

"ჩვენთვის არ აქვს მნიშვნელობა, პირდაპირ რომ გითხრათ, ბიზნესს გავაკეთებდით ვაკის პარკის მიმდებარე ტერიტორიაზე ჭავჭავაძის ქუჩაზე, მთაწმინდაზე, გლდანში თუ ვარკეთილში", — აღნიშნა ზაქაიძემ.

ვაკის პარკში სასტუმროს მშენებლობასთან დაკავშირებით მერია და ინვესტორი ამბობენ, რომ შეთანხმებას მიაღწიეს. შეხვედრის შემდეგ მერმა, კახა კალაძემ, განაცხადა, რომ პარკში არაფერი აშენდება. ხოლო ინვესტორს ადგილმონაცვლეობა ან გამოსყიდვა შესთავაზეს.

ჯერჯერობით უცნობია რომელ შემოთავაზებას დათანხმდება ინვესტორი. გარდა ამისა, არ კონკრეტდება ადგილმონაცვლეობისთვის რომელი ტერიტორიები შესთავაზეს ან გამოსყიდვისთვის რა თანხაზეა საუბარი.

"რეალობიდან გამომდინარე იმიტომ, რომ ქალაქის მერიამაც გვთხოვა, ის წინადადებები, რომლებიც შემოგვთავაზეს არის რეალობასთან ახლოს და არის ადეკვატური, დავთანხმდით გაცვლაზე", — განაცხადა ზაქაიძემ შეხვედრის შემდეგ.

სასტუმროს ინვესტორსა და მერს შორის შეხვედრა 21 იანვარსაც გაიმართა. მაშინ მხარეებმა შეთანხმებას ვერ მიაღწიეს. შეხვედრის შემდეგ ინვესტორი ამბობდა, რომ მერია საზოგადოების მცირე ნაწილის ზეწოლის ქვეშ არის და "ხელების გადაგრეხვაზე არიან გადასულები".

ზაქაიძე მაშინ ამბობდა, რომ მერიის შემოთავაზებები მისთვის მიუღებელია და ნებართვის არაღდგენის შემთხვევაში სასამართლოს მიმართავენ და ზიანის ანაზღაურებასაც მოითხოვენ.