პოლიტიკური გაერთიანება გირჩი აპირებს საკონსტიტუციო სასამართლოში შეიტანოს სარჩელი, რომ "ქართველ კაცს ეკუთვნის თავისი ბოჩოლა". ამის შესახებ გირჩის წევრმა იაგო ხვიჩიამ ტელეკომპანია მესამეს ეთერში განაცხადა.

ამ ინიციატივით გირჩი გამოეხმაურა მთავრობის ახალ დადგენილებას, რომლის მიხედვითაც, წლის დასაწყისიდან საქართველოდან 140 კილოგრამამდე მოზარდი მსხვილფეხა საქონლის ექსპორტი აიკრძალა.

"საქმე აქ არა ბოჩოლაში, არამედ საკუთრების შინაარსის გაგებაშია. როგორც პირველ საქმეზე ვცადეთ აგვეხსნა, რომ ჩემი სხეული მე მეკუთვნის, ასევე უნდა ავხსნათ, რომ ადამიანის შრომის შედეგად შექმნილი პროდუქტი მას ეკუთვნის", — განაცხადა იაგო ხვიჩიამ.

მისი თქმით, მთავრობის ახალი დადგენილება აბსურდულია და მთავრობის "ხუშტურს" გამოხატავს.

"ჯერ გასუქდნენ და მერე გავიდნენ, გასუქების პროცესი ვაწარმოოთ საქართველოში. ეს არის ამ დადგენილების არსი", — განმარტავს იაგო ხვიჩია.

სოფლის მეურნეობის მინისტრის მოადგილემ, გიორგი ხანიშვილმა პირველ არხს განუცხადა, რომ აკრძალვის მიზანი ქვეყანაში მსხვილფეხა საქონლის ზრდის შედეგად, მეტი დამატებული ღირებულების შექმნაა.

"ეს ნიშნავს, რომ ხბოს ასაკში ნაკლები პირუტყვი გავა, განვითარდება უშუალოდ საქონლის ბაზა, განვითარდება ადგილზე ხორცის წარმოება. ამავე დროს, სტიმული მიეცემათ ადგილზე იმ ფერმერებს, რომლებიც გაზრდიან ამ საქონელს. გაიზრდება საექსპორტო პოტენციალიც კილოგრამებში, შესაბამისად მეტი შემოსავალი ექნება ქართულ ეკონომიკას", — აცხადებს მინისტრის მოადგილე.

გიორგი ხანიშვილის განცხადებით, ბოლო პერიოდში შეინიშნება ხორცზე ფასის მატება. უწყებაში მიაჩნიათ, რომ ახალი დადგენილებით, ეს პროცესიც დასტაბილურდება და ხორცზე ხელმისაწვდომობაც გაიზრდება.

გარემოს დაცვისა და სოფლის მეურნეობის სამინისტროში მიაჩნიათ, რომ ცვლილება მეტ სტიმულს გააჩენს ფერმერებში, რომ მათ თავად გაზარდონ რქოსანი პირუტყვი, რაც საბოლოოდ განავითარებს არა მარტო მეხორცეული ჯიშის წარმოებას, არამედ საკვები ბაზის წარმოებას, განავითარებს იმ სეგმენტებს, რომელიც მნიშვნელოვანია მაღალპროდუქტიულ ჯიშებზე გადასვლისათვის.