საქართველოს კულტურული მემკვიდრეობის დაცვის ეროვნულმა სააგენტომ "ხაჭაპურის ტრადიციას საქართველოში" არამატერიალური კულტურული მემკვიდრეობის ძეგლის სტატუსი მიანიჭა.

სააგენტოს განცხადებით, ეს სტატუსი ხაჭაპურის დაცვის მექანიზმია. მათივე თქმით, მნიშვნელოვანია საერთაშორისო სივრცეში ხაჭაპურის პოპულარიზაცია მოხდეს, როგორც ქართული პროდუქტის.

"ხაჭაპური ქართული სამზარეულოს ერთ-ერთი უმნიშვნელოვანესი კომპონენტია. ის ქართული კულინარიული კულტურის სავიზიტო ბარათი და კვებითი რაციონისა და ქართული რიტუალის შემადგენელია", — წერია კულტურული მემკვიდრებოსი დაცვის სააგენტოს განცხადებაში.

ქართული ხაჭაპური მსოფლიოში ერთ-ერთ ყველაზე ცნობილ კერძად იქცა. განსაკუთრებული ყურადღება აჭარულმა ხაჭაპურმა მიიქცია, რომელსაც უცხოეთში ყველის ნავს უწოდებენ. მის შესახებ ხშირად წერს უცხოური მედია. საზღვარგარეთ კი არაერთი რესტორანი გაიხსნა, სადაც აჭარულ ხაჭაპურს ამზადებენ. თუმცა ამ დრომდე ბევრისთვის უცნობი იყო, რომ ის ქართული კერძია.