ევროპული საქართველოს დეპუტატი, სერგი კაპანაძე აცხადებს, რომ ქართულმა ოცნებამ ევროსაბჭოში ე.წ. მაგნიტსკის სიას მხარი არ დაუჭირა და არც რეზოლუციის განხილვის პროცესში მიიღო მონაწილეობა.

სერგი კაპანაძე მიმართავს ქართულ ოცნებას, განმარტონ, რა მოტივით არ დაუჭირეს მხარი ამ სიას.

"ეს რეზოლუცია არა მარტო ოთხოზორია-ტატუნაშვილის სიითაა ცნობილი, არამედ იმითაც რომ ოკუპანტ ქვეყანას მოუწოდებს, დაიცვას ადამიანის უფლებები. საქართველოს დელეგაციიდან ხელისუფლების წარმომადგენლების არც ერთი მხარდამჭერი პოზიცია არ დაფიქსირებულა. მე მივმართავ ქართულ ოცნებას, რომ განმარტონ თავიანთი პოზიცია, რატომ არ დაუჭირეს მხარი ამ ძალიან მნიშვნელოვან რეზოლუციას. ეს არის მორიგი მაამებლური ნაბიჯი რუსეთისადმი, თუ სხვა რაიმე მიზეზია", — განაცხადა სერგი კაპანაძემ საგანგებო ბრიფინგზე.

ევროსაბჭოს საპარლამენტო ასამბლეამ მიიღო რეზოლუცია ე.წ. მაგნიტსკის სიაზე. ეს არის რეზოლუციას, რომელიც მოუწოდებს ევროპის ქვეყნებს გაავრცელონ ე.წ. ჭკვიანი სანქციები იმ ქვეყნებსა და ადამიანებზე, რომლებიც არღვევენ ადამიანის უფლებებს, მათ შორის ოკუპირებულ ტერიტორიებზე.

საქართველოს საპარლამენტო დელეგაციის ხელმძღვანელი, თამარ ჩუგოშვილი უარყოფს სერგი კაპანაძის მიერ გავრცელებულ ინფორმაციას და ამბობს, რომ თავად ამ სიას მხარი დაუჭირა.

"ე.წმაგნიტსკის სიაზე პასეს რეზოლუციაში ოთხოზორია-ტატუნაშვილის სიაზე შესულ ცვლილებებს საქართველოდან ყავს ოთხი ინიციატორი, ორი უმრავლესობიდან, ორი უმცირესობიდან: დავით ბაქრაძე, გიორგი კანდელაკი, დიმიტრი ცქიტიშვილი, ზვიად კვაჭანტირაძე. მე პირადად მხარი დავუჭირე კენჭისყრაში. უხერხულია მეგობრებო, ძალიან!", — წერს ჩუგოშვილი.