ჭიდაობის ფედერაციის პრეზიდენტი, გეგა გეგეშიძე ამბობს, რომ 11 იანვარს მომხდარი ინციდენტის დროს მას არავისთვის არაფერი ჩაურტყამს და არც ჯაჭვი სჭერია ხელში. ამის შესახებ გეგეშიძემ ტელეკომპანია იმედთან განაცხადა.

"ჩხუბი არა, უფრო შეხლა-შემოხლა იყო. ვის წარბი გაუსკდა და ვის თავი გაუტყდა, ეს არავის დაუნახავს და პირადად, მეც არ დამინახავს. ზოგი იძახის, რომ ხელკეტი ჩავარტყი, ზოგი ამბობს, რომ ჯაჭვი ჩავარტყი, დავჭერი. ერთი ერთს ამბობს, მეორე — მეორეს. მე პირდაპირ ვიძახი, არც არავისთვის არაფერი ჩამირტყამს, არც ჯაჭვი მჭერია, არც ხელკეტი და არც არავინ დამიჭრია", — ამბობს გეგეშიძე და დასძენს, რომ ამ ინციდენტის გამო თანამდებობის დატოვებას არ აპირებს.

შინაგან საქმეთა სამინისტროს ინფორმაციით, ამ საქმეზე დაწყებული გამოძიების ფარგლებში მათთან გამოკითხვაზე არავინ მივიდა, თუმცა, ფედერაციის პრეზიდენტი ამბობს, რომ გამოძიებასთან თანამშრომლობას აპირებს.

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.