საქართველოს პრეზიდენტი, სალომე ზურაბიშვილი საარჩევნო პროცესში "არა ნაციზმისგან" მიღებული შემოწირულობის გამო შესაძლოა, 34 720 ლარით დაჯარიმდეს. სახელმწიფო აუდიტის სამსახურმა საარჩევნო კამპანიის მონიტორინგის დროს გამოვლენილ საკითხებზე სანქცირებისთვის სასამართლოს მიმართა. გადაწყვეტილება ჯერ ცნობილი არ არის.

პრეზიდენტის სანქცირების მიზეზი საარჩევნო პროცესში "არა ნაციზმის" მიერ რეგიონებში ხალხის ტრანსპორტირებისა (9 200 ლარი) და თბილისში, რუსთაველის გამზირზე ოფისის ქირის (8 160 ლარი) ხარჯის გამო იგეგმება.

"აუდიტის სამსახურმა ჩაატარა მოძრაობის ხელმძღვანელის, ნანა კაკაბაძის და სხვა დაკავშირებული პირის გამოკითხვა... [ტრანსპორტირება და ოფისის დაქირავება] ჩაითვალა სალომე ზურაბიშვილის სასარგებლო შემოწირულებად, რის საფუძველზეც შედგენილ იქნა ადმინისტრაციული სამართალდარღვევის ოქმი", — აღნიშნულია აუდიტის სამსახურის ანგარიშში.

ორივე შემთვევაში აუდიტის სამსახურს არასამთავრობო ორგანიზაცია სამართლიანმა არჩევნებმა მიმართა.