აშშ-ს პრეზიდენტმა, დონალდ ტრამპმა წარმომადგენლობითი პალატის სპიკერისა და დემოკრატების ლიდერის, ნენსი პელოსის ვიზიტები ავღანეთში, ბრიუსელსა და ეგვიპტეში გააუქმა. ტრამპმა პელოსის წერილით აცნობა, რომ ე.წ. შათდაუნის გამო ავღანეთში ვიზიტისთვის სამხედრო თვითმფრინავს არ გამოუყოფდა.

წინა დღეს, 16 იანვარს, ნენსი პელოსიმ მოუწოდა პრეზიდენტს, ე.წ. შათდაუნის გამო კონგრესში ქვეყნის მდგომარეობის შესახებ ყოველწლიური გამოსვლა გადაედო. ადგილობრივი მედიის ცნობით, ვიზიტების გაუქმება პასუხია სპიკერის მოწოდებაზე. თეთრი სახლის პრესსპიკერი, სარა სანდერსი პრეზიდენტის წერილს ტვიტერზე აქვეყნებს:

"შვიდდღიან ვიზიტს მაშინ დავნიშნავთ, როდესაც ე.წ. შათდაუნი დასრულდება. მაშინ, როდესაც 800 ათასი შესანიშნავი ამერიკელი ხელფასს ვერ იღებს, დარწმუნებული ვარ დამეთანხმებით, რომ ამ საზოგადოებრივი ურთიერთობის ღონისძიებების გადადება შესაფერისია".

პრეზიდენტი, ასევე, აღნიშნავს, რომ უკეთესია სპიკერი ვაშინგტონში იყოს და მთავრობის დახურვის დასასრულებლად სასაზღვრო დაცვის მოძრაობას შეუერთდეს.

დემოკრატი სპიკერისა და რესპუბლიკელი პრეზიდენტის დაპირისპირება მექსიკის კედლის გამო უკვე დიდი ხანია გრძელდება. პრეზიდენტმა რამდენიმე დღის წინ ტვიტერზე დაწერა:

"რატომ იღებს ანაღაურებას ნენსი პელოსს მაშინ, როდესაც მომუშავე ხალხი - არა".

ე.წ. შათდაუნი 24-ე დღეა გრძელდება და ამერიკის ისტორიაში ყველაზე ხანგრძლივია. ფედერალური სამსახურები დაფინანსების გარეშე დარჩნენ, რადგან კონგრესის წარმომადგენლობით პალატაში დემოკრატები მექსიკის კედლისთვის 5 მილიარდი დოლარის დაფინანსების გამოყოფაზე უარს ამბობენ. კედლის დაფინანსების გარეშე კი ტრამპი უარს ამბობს ბიუჯეტის ხელმოწერაზე.

ამავე თემაზე: