ფოთისა და ხობის მიტროპოლიტი, მეუფე გრიგოლი ხელისუფლების მიერ უკრაინისთვის ეკლესიის ავტოკეფალიის მილოცვისგან თავის შეკავება გულდასაწყვეტია. ამის შესახებ მიტროპოლიტმა გრიგოლმა 13 იანვარს, საკვირაო ქადაგებისას განაცხადა და აღნიშნა, რომ ეს შორსმჭვრეტელობით არ უნდა იყოს გამოწვეული.

მიტროპოლიტი მიიჩნევს, რომ უკრაინისთვის ეროვნული ეკლესიის არსებობას რელიგიურთან ერთად სახელმწიფო მნიშვნელობა აქვს.

"საქართველოს ეკლესია თუ აღმოჩნდა ამ "ახალი" ცენტრის ორბიტაზე, ჩათვალეთ, რომ ქართულ სახელმწიფოსაც სავალალო ბედი ელის... როდესაც ჩვენ ვისმენთ მოსაზრებას, რომ ეკლესიასთან ერთად იმსჯელებენ ამ [ავტოკეფალიის] საკითხზე, ჩვენ ვხედავთ, რომ ან ვერ აცნობიერებენ საკუთარ ვალდებულებებს კოლეგებისა და მეგობარი სახელმწიფოს მიმართ, ან შეცდომაში არიან შეყვანილნი მცდარად გაგებული რელიგიურობით", — განმარტა მან.

მეუფე ასევე ამბობს, რომ აზრთა სხვადასხვაობა სერიოზული პრობლემაა არა მხოლოდ საზოგადოებაში, არამედ ეკლესიაშიც, მაღალ იერარქთა შორისაც კი:

"ერთიანი აზრის ჩამოყალიბება (კონსესუსის მიღწევა) აქაც კი რთულად მიმდინარეობს; ამას აქვს, რა თქმა უნდა, თავისი მიზეზები. ჩვენ ვცდილობთ, რომ ამ პროცესმა არ მიიღოს კონფრონტაციის ხასიათი".

მიტროპოლიტი გრიგოლი ამბობს, რომ საქართველოს მართლმადიდებელ ეკლესიას დღეს უკვე გავლენა აქვს არამარტო ქვეყნის შიდა პოლიტიკურ ცხოვრებაზე, არამედ "მისმა შიდა რეიტინგმა ასახვა ჰპოვა ქვეყნის საგარეო პოლიტიკაზეც კი":

"ამის თვალსაჩინო მაგალითია საქართველოს უმაღლესი პოლიტიკური ლიდერების გამონათქვამები და მათი შეფასებები უკრაინაში მიმდინარე უმნიშვნელოვანეს პროცესებთან დაკავშირებით".

ქადაგებისას მიტროპოლიტმა აღნიშნა, რომ უკრაინაში მიმდინარე პროცესები იმ ძალებს გააერთიანებს, ვისაც საქართველოს მომავალი "ცივილიზებული კაცობრიობის ორბიტაზე წარმოუდგენია", და იმ ძალებს გამოამჟღავნებს, "ვისაც წარსულში დაბრუნების დაუოკებელი ნოსტალგია აწუხებს".

მიტროპოლიტს მიაჩნია, რომ უკრაინის თემა წარსულსა და მომავალს შორის, სერიოზული წყალგამყოფია. მისივე თქმით, სახელმწიფოსა და ეკლესიას თავ თავისი ფუნქციები აქვთ, "რომელთა ერთმანეთში აღრევაც გამოუსწორებელ შედეგს მოიტანს".

"არასწორი ქმედების გამო ადამი და ევა განდევნილნი აღმოჩნდნენ იმ წიაღიდან, რომელ წიაღში ყოფნაც მათთვის ბუნებრივ მდგომარეობას წარმოადგენდა; მსგავსადვე ვიტყვით: თუ შიშმა დაგვიბრმავა თვალი და არასწორ გზას დავადექით, ეჭვგარეშეა, რომ თავისუფალ სამყაროს მოწყვეტილნი აღმოვჩნდებით და დიდი ხნით დასამარდება მრავალი თაობის მიერ ნანატრი თავისუფლებაც და დამოუკიდებლობა", — ამბობს მიტროპოლიტი გრიგოლი.

არც საპატრიარქოს და არც ხელისუფლებას უკრაინის ეკლესიისთვის ავტოკეფალიის მინიჭება ოფიციალურად არ მიულოცავს. მიუხედავად ამისა, შემოქმედელმა მიტროპოლიტმა იოსებმა მისალოცი წერილი საკუთარი ეპარქიის გვერდზე გამოაქვეყნა. მისი თქმით, უკრაინა ღირსია ავტოკეფალური ეკლესია ჰქონდეს, "რამეთუ იგი საუკუნეებია იბრძოდა მიეღო დამოუკიდებლობა".

უკრაინის ეკლესიის ავტოკეფალიის საკითხზე რამდენიმე დღის წინ პოზიცია საჯაროდ დააფიქსირა დეკანოზმა ილია ჭიღლაძემაც: "ვინც არ ულოცავს უკრაინელ ერს ამ გამარჯვებას, ის ან რუსულ იმპერიალიზმს ეტრფის და ემსახურება, ან შეშინებული კონფორმისტია".

ახალქალაქისა და კუმურდოს მიტროპოლიტის განცხადებით, საპატრიარქო ავტოკეფალიის მინიჭების ტომოსს (ბრძანებას) მომდევნო სინოდის სხდომაზე შეისწავლის და შემდეგ ექნება ოფიციალური პოზიცია.

"ტომოსი ხომ უნდა წავიკითხოთ, იქნებ რა წერია ამ ტომოსში, როგორ შეიძლება რომ გამოვხატოთ ოფიციალურად", — განაცხადა მიტროპოლიტმა ნიკოლოზმა.

6 იანვარს სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს ტომოსი ანუ ბრძანება გადასცა. ამით, ოფიციალურად გამოეყო უკრაინის ეკლესია რუსეთის ეკლესიას და ფორმალურად გაფორმდა ოქტომბერში მიღწეული შეთანხმება, ავტოკეფალიის მინიჭებაზე.

წინა დღეს, 5 იანვარს მსოფლიო პატრიარქმა ბართლომემ ტომოსს ხელი მოაწერა. ტომოსის გადაცემის ცერემონიას დაესწრნენ უკრაინის მთავრობის წევრები, უმაღლესი რადას სპიკერი და პრეზიდენტი პეტრო პოროშენკო.

უკრაინის ეკლესიის ავტოკეფალია და საქართველო

კიევის პატრიარქი უკრაინის ეკლესიის ავტოკეფალიის საკითხზე საქართველოს მხარდაჭერას ელოდება.

"საქართველოს ეკლესიას უნდა ახსოვდეს თავისი ისტორია", — განაცხადა კიევის პატრიარქმა, ფილარეტმა.

საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდება.

პატრიარქის მდივნის, მიქაელ ბოტკოველის განცხადებით, სინოდის სხდომა გადაწყვეტს რა პოზიცია ექნება საქართველოს უკრაინის ეკლესიის ავტოკეფალიასთან მიმართებაში. თუმცა მისივე თქმით, ოკუპაციის პირობებში კონსტანტინოპოლის ეკლესიის უპირობო მხარდაჭერა არასწორია.

უკრაინის ეკლესიის ავტოკეფალიის საკითხი

უკრაინის ეკლესიისთვის ავტოკეფალიის მინიჭების საკითხი მსოფლიო პატრიარქსა და რუსეთის საპატრიარქოს შორის განხეთქილების მიზეზად იქცა.

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. ამ გადაწყვეტილებას მხარი დაუჭირეს უკრაინის პრეზიდენტმა და უმაღლესმა რადამ. მსოფლიო პატრიარქი ბართლომე ამბობდა, რომ უკრაინა ავტოკეფალიას მალე მიიღებს, რადგან ეს მისი უფლებაა.

სინოდის სხდომის დროს რუსეთის საპატრიარქომ გადაწყვიტა, რომ უკრაინის საკითხის გამო მსოფლიო პატრიარქს ბართლომე პირველს ლოცვებში აღარ მოიხსენიებდა. ასევე, მის წარმომადგენლებთან ყველანაირ ურთიერთობას წყვეტდა.