საქართველოს პარლამენტის თავმჯდომარის, ირაკლი კობახიძის განცხადებით, გუნდის წევრების მიმართ სანქცია ან სხვა მიდგომა დღის წესრიგში გუნდურობის პრინციპის დარღვევის დროს ხდება. ასე უპასუხა ირაკლი კობახიძემ კითხვას, გარიცხავენ თუ არა ეკა ბესელიამ ქართული ოცნებიდან.

მისი თქმით, ქართული ოცნებისთვის გუნდურობის პრინციპის დაცვაა მთავარი და აზრთა სხვადასხვაობის გამო გუნდი არავის დაუტოვებია.

"აზრთა სხვადასხვაობა ვერ გახდება რაიმე სანქციის ან სხვა მიდგომის საფუძველი, შეიძლება ასეთი რამ დღის წესრიგში დადგეს, თუ რომელიმე დეპუტატი არღვევს გუნდურობის პრინციპს. ეს პრინციპი დაირღვა არაერთხელ, ჩვენ შევხედავთ, არ ვჩქარობთ, მე იმედი მაქვს, რომ ყველა დეპუტატი დაიცავს გუნდურობის პრინციპს და იმოქმედებს გუნდის წევრების ინტერესებით", — განაცხადა ირაკლი კობახიძემ.

მისი თქმით, მთავარი, რომ საზოგადოებას არასწორი ინფორმაცია არ მიაწოდონ.

"გარკვეული დეპუტატების მხრიდან ბევრი ტყუილი მოვისმინე", — განაცხადა პარლამენტის თავმჯდომარემ.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.

10 იანვარს ქართული ოცნების თავმჯდომარემ, ბიძინა ივანიშვილმა განცხადება გაავრცელა, რომელშიც აღნიშნა, რომ ეკა ბესელია იურიდიულ საკითხთა კომიტეტის თავმჯდომარის თანამდებობიდან გადადგომის შემდეგ პარტიის და გუნდურობის პრინციპების წინააღმდეგ წავიდა.