ამერიკის შეერთებული შტატები უკრაინის ეკლესიას ავტოკეფალიის მინიჭებას ულოცავს. აშშ-ს სახელმწიფო მდივნის, მაიკ პომპეოს ეს განცხადება აშშ-ს სახელმწიფო დეპარტამენტის ოფიციალურ ვებგვერდზე გამოქვეყნდა.

"უკრაინის დამოუკიდებელი მართლმადიდებელი ეკლესიის ავტოკეფალიის გამოცხადება ისტორიული მიღწევაა მაშინ, როდესაც უკრაინა საკუთარი მომავლის განსაზღვრისკენ ისწრაფვის", — ნათქვამია განცხადებაში.

ამავე განცხადებაში ნათქვამია, რომ აშშ მხარს უჭერს უკრაინის დამოუკიდებლობას.

სახელმწიფო დეპარტამენტის განცხადებაში ასევე ვკითხულობთ, რომ აშშ მხარს უჭერს რელიგიურ თავისუფლებას, მათ შორის სხვადასხვა რელიგიური ჯგუფების წარმომადგენლებს.

"ჩვენ მივესალმებით მიტროპოლიტ ეპიფანის განცხადებებს, რომ უკრაინის მართლმადიდებელი ეკლესია ღიაა ყველა მორწმუნესთვის. ეს ახალისებს ტოლერანტობას და სხვისი რელიგიური მრწამსის პატივისცემას", — აცხადებს მაიკ პომპეო.

სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს, მიტტროპოლიტ ეპიფანს ტომოსი გადასცა, რითაც ახალი ეკლესიის შექმნა ფორმალურად დასრულდა. უკრაინის მართლადიდებლური ეკლესია გახდა მე-15 ადგილობრივი ეკლესია.

უკრაინის ეკლესიის ავტოკეფალიის საკითხი

უკრაინის ეკლესიისთვის ავტოკეფალიის მინიჭების საკითხი მსოფლიო პატრიარქსა და რუსეთის საპატრიარქოს შორის განხეთქილების მიზეზად იქცა.

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. ამ გადაწყვეტილებას მხარი დაუჭირეს უკრაინის პრეზიდენტმა და უმაღლესმა რადამ. მსოფლიო პატრიარქი ბართლომე ამბობდა, რომ უკრაინა ავტოკეფალიას მალე მიიღებს, რადგან ეს მისი უფლებაა.

სინოდის სხდომის დროს რუსეთის საპატრიარქომ გადაწყვიტა, რომ უკრაინის საკითხის გამო მსოფლიო პატრიარქს ბართლომე პირველს ლოცვებში აღარ მოიხსენიებდა. ასევე, მის წარმომადგენლებთან ყველანაირ ურთიერთობას წყვეტდა.

კიევის პატრიარქ ფილარეტს ავტოკეფალიის საკითხში საქართველოს მართლმადიდებელი ეკლესიის საპატრიარქოს მხარდაჭერის იმედი აქვს. თუმცა, საქართველოს საპატრიარქომ პოზიციის დაფიქსირებას თავის შეკავება არჩია. თავდაპირველად საპატრიარქომ ამის მიზეზად ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდებოდა.