თბილისის საქალაქო სასამართლო ვერ იწყებს ხორავას ქუჩის საქმეზე ჩვენების შეცვლისთვის ბრალდებული დ.ღ.-ს საქმის განხილვას. ამავე მიზეზის გამო თბილისის საქალაქო სასამართლოში არაერთი სხდომა ვერ იმართება. სასამართლოს პრესსამსახურში On.ge-ს უთხრეს, რომ დენი დაახლოებით ორი საათია, რაც არ მიეწოდებათ, შენობის ნაწილი კი გენერატორზე მუშაობს.

ელექტროენერგია სასამართლოს მუშაობისთვის აუცილებელია, რადგან ყველა პროცესის აუდიო და ვიდეო ჩაწერა ხდება.

On.ge-ს ჟურნალისტის ინფორმაციით, ადვოკატები და პროკურორები დენის ჩართვას სასამართლოს დერეფანში ელოდებიან. სხდომა 13 საათზე იყო ჩანიშნული, პროკურორები და ადვოკატები კი აცხადებენ, რომ დაცდა 16 საათამდე შეუძლიათ.

19 იანვარს გადის 6-თვიანი ვადა, როცა არასრულწლოვანი დ.ღ.-სთვის არასრულწლოვანთა მართლმსაჯულების კოდექსით აღკვეთის ღონისძიებად პატიმრობა შეიძლება იყოს შეფარდებული.

30 ნოემბერს ხორავას ქუჩაზე მომხდარი მკვლელობის საქმეზე ცრუ ჩვენების მიცემის ბრალდებით დაკავებული არასრულწლოვანი, დ.ღ. მოსამართლემ პატიმრობაში დატოვა.

გამოძიების ვერსიით, დ.ღ.-მ, რომელიც უშუალოდ შეესწრო დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება.
ბრალდების მხარის მტკიცებით, სასამართლო სხდომამდე დ.ღ. შეხვდა გარდაცვლილი დავით სარალიძის მამას, ზაზა სარალიძეს და ესაუბრა ხორავას ქუჩაზე მომხდარი მკვლელობის ფაქტობრივ გარემოებებთან დაკავშირებით, თუმცა, სასამართლო განხილვის სტადიაზე მსგავსი შეხვედრა უარყო.