9 იანვრის სავაჭრო დღის დახურვის შემდეგ ლონდონის საფონდო ბირჟაზე თიბისი ბანკის აქციებზე ფასი 5,38 პროცენტით შემცირდა. სავაჭრო დღის გახნის მომენტისთვის ქართული ბანკის აქციაზე ფასი 15 გირვანქა სტერლინგს შეადგნედა, ხოლო დღის მიწურულს 14,08 გირვანქა სტერლინგს. ინფორმაცია ამ საკითხზე თავდაპირველად ბიზნეს მედია ჯგუფმა გაავრცელა.

ფოტო: Bloomber.com

$803 მილიონიდან $760 მილიონამდე შემცირდა კომპანიის საბაზრო კაპიტალიზაციაც. უკანასკნელი ექვსი თვის განმავლობაში ბანკის აქციებზე მაქსიმალური ფასი 6 აპრილს დაფიქსირდა (‎18,96 გირვანქა სტერლინგი), ხოლო მინიმალური — 24 დეკემბერს (13,50 გირვანქა სტერლინგი). ბოლო ერთი წლის მანძილზე ბანკის აქციებზე ფასები ‎13,42-დან ‎19,3 გირვანქა სტერლინგამდე მერყეობდა.

თიბისის აქციების გაუფასურებასთან ერთად 5,57 პროცენტით გაიზარდა ლონდონის საფონდო ბირჟაზე განთავსებული კიდევ ერთი ქართული ბანკის, საქართელოს ბანკის აქციების ფასი. 9 იანვარს საქართველოს ბანკმა აქციების ფასი 14,19-დან 15,2 გირვანქა სტერლინგამდე გაიზარდა, თუმცა საბაზრო კაპიტალიზაციით ის დაახლოებით ‎10 მილიონით კვლავ ჩამორჩება კონკურენტს.

ფოტო: bloomberg.com

თიბისი ბანკის აქციების ფასის ვარდნა დროში ემთხვევა საქართველოს პროკურატურის განცხადებას, რომლის მიხედვითაც, ბანკიდან ფულის გათეთრების საქმეში მისი მეწილეები ფიგურირებენ.

9 იანვარს პროკურატურამ განცხადება გაავრცელა, რომლის მიხედვითაც თიბისი ბანკის დამფუძნებლებმა, მამუკა ხაზარაძემ და ბადრი ჯაფარიძემ ფული, როგორც ფიზიკურმა პირებმა, იმ კომპანიისგან ისესხეს, რომელსაც 17 მილიონი აშშ დოლარის სესხი თავად ბანკმა მისცა. უწყების ცნობით, 2008 წლის ბოლოს ბანკმა, აღნიშნული სესხები, საბანკო რეგულაციებით დადგენილ ვადაზე ადრე, დაუსაბუთებლად ჩამოწერა და გარე საბალანსო ანგარიშზე გადაიტანა, ხოლო 2012 წელს საერთოდ გაათავისუფლა ეს კომპანიები ბანკის წინაშე არსებული სასესხო ვალდებულებისგან, როდესაც დათანხმდა ამ ვალდებულებების ოფშორულ კომპანიაზე გადატანას.

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. თიბისი ბანკმა დოკუმენტების ამოღებასთან დაკავშირებით პროკურატურას დღეს, 9 იანვარს უპასუხა და გავრცელებული ინფორმაციას "მიზანმიმართული დისკრედიტაციისა და რეპუტაციის შელახვის მცდელობას" უწოდებს.