თიბისი ბანკის დოკუმენტების ამოღებასთან დაკავშირებით პროკურატურას პასუხობს და გავრცელებულ ინფორმაციას "მიზანმიმართული დისკრედიტაციისა და რეპუტაციის შელახვის მცდელობას" უწოდებს.

ბანკის განცხადებაში ნათქვამია, რომ პროკურატურის მიერ ამღებული დოკუმენტები ეხება 2008 წლის რიგით, კანონიერ საბანკო ოპერაციას. ბანკში On.ge-ს განუცხადეს, რომ საქმე ეხება კერძო კლიენტის საბანკო ოპერაციას, რასაც ვერ გაასაჯაროვებენ.

"[დოკუმენტაცია] არაერთხელ იქნა სახელმწიფო სტრუქტურების და ეროვნული ბანკის მიერ შესაბამის პერიოდებში შემოწმებული, როგორც მოქმედი ისე წინა ხელისუფლების დროს.· არაერთხელ იქნა საერთაშორისო აუდიტორების მიერ შემოწმებული და მათი სისწორე დადასტურებული. ამასთან, მოცემული ტრანზაქცია ხანდაზმულია", — ნათქვამია განცხადებაში.

თიბისი ბანკი რამდენიმე მედიაპორტალის გავრცელებულ ინფორმაციას, თითქოს, საქმე ომეგა ჯგუფს უკავშირდება, "მცდარსა" და "მიზანმიმართულად დამახინჯებულ ინფორმაციას" უწოდებს.

გუშინ, 9 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. უწყებაში არ ამბობდნენ, რა საქმესთან დაკავშირებით ამოიღეს ბანკიდან ინფორმაცია, თუმცა განმარტავდნენ, რომ დოკუმენტები ომეგა ჯგუფის საქმეს არ ეხება.