Paradise Papers-ის გამოძიებაზე მუშაობისთვის თურქ ჟურნალისტს ერთწლიანი პატიმრობა მიუსაჯეს. The Guardians წერს, რომ მოპოვებული მასალა ეხებოდა თურქეთის ყოფილი პრემიერისა და მისი შვილების ბიზნესაქტივობებს. პელინ იუნკერი გამომძიებელ ჟურნალისტთა საერთაშორისო კონსორციუმის (ICIJ) წევრია. მალტაში, ბინალი ილდირიმისა და მისი შვილების კომპანიის შესახებ წერის გამო იგი სტამბოლის სასამართლომ დამნაშავედ სცნო "ცილისწამებისა და შეურაცხყოფისთვის".

ილდირიმი 2016 წლიდან 2018 წლამდე თურქეთის პრემიერ-მინისტრი იყო. ჟურნალისტმა თქვა, რომ მოსამართლის განაჩენს გაასაჩივრებს. მისივე ცნობით, ილდირიმის ოჯახმა აღიარა, რომ მალტის ბიზნესის შესახებ სტატიაში მოყვანილი ფაქტები ზუსტი იყო:

"ეს გადაწყვეტილება მოულოდნელი არ ყოფილა ჩვენთვის, ვინაიდან თავიდანვე ცხადი იყო. თუ რა შედეგამდე მივიდოდნენ. არანაირი სისხლის სამართლის დანაშაულის ნიშნები არ არის ჩემს სტატიებში. ფაქტია, რომ ბინალი ილდირიმის შვილებს მალტაში კომპანიები აქვთ".

ჟურნალისტთა დაცვის კომიტეტის 2018 წლის მონაცემით, თურქეთს მსოფლიოში ყველაზე მეტი, 68 დაპატიმრებული ჟურნალისტი ჰყავს. ყველა მათგანს ბრალად ედება სახელმწიფოს წინაშე ჩადენილი დანაშაული.

Paradise Papers-ზე მუშაობისას გამომძიებელმა ჟურნალისტებმა ოფშორული იმპერიების შესახებ ინფორმაციის შემცველი 13,4 მილიონი დოკუმენტი მოიპოვეს. ფაილების უმრავლესობა, უკავშირდება იურიდიულ ფირმას და კორპორატიული სერვისის პროვაიდერს, რომლებიც Appleby-ის სახელით 10 იურისდიქციაში ოპერირებდნენ ერთად.

ოფშორულ ზონებში დარეგისტრირებულ კომპანიებს იყენებენ ისეთი აქტივების შესანახად, როგორებიცაა თვითმფრინავები, იახტები, ინვესტიციები და აქციები. Appleby-ის მონაცემები 25 ათას ოფშორულ კომპანიას შეიცავს. ყველაზე პოპულარული იურისდიქციები დიდი ბრიტანეთის შემადგენლობაში არსებული კუნძულები, ბერმუდა და კაიმანის კუნძულებია. ასევე, პოპულარულია ბრიტანეთის ვირჯინიის კუნძულები.

გაიგეთ მეტი: რა არის Paradise Papers?