იუსტიციის უმაღლესი საბჭოს არამოსამართლე წევრი, ანა დოლიძე აცხადებს, რომ საბჭოს მოსამართლე წევრები პოლიტიკური დებატებში მონაწილეობენ იმ ჯგუფის მხარეს, რომელმაც მოიყვანა ქართული ოცნება ხელისუფლებაში.

მისივე განცხადებით, მოსამართლეების მიერ გაკეთებული პოლიტიკური განცხადებები ანგრევს სასამართლო სისტემის ძირითად პრინციპებს.

"მათი სურვილია, რომ აქტიური მონაწილეობა მიიღონ პოლიტიკურ დებატებში იმ ჯგუფის მხარეს, რომლისთვისაც არ ყოფილა არც გირგვლიანის საქმე, არც ზერეკიძის საქმე, არც ყუფარაძის საქმე, არც მოლაშვილის საქმე და არცერთი საქმე, რომელმაც შექმნა საქართველოს ისტორია და სხვათა შორის, მოიყვანა „ქართული ოცნება“ ხელისუფლებაში. ეს მოსამართლეები ამ ქმედებით არჩევენ ეთიკის კოდექსს, ვინაიდან მათ ეკრძალებათ პოლიტიკური აზრის გამოთქმა და პოლიტიკურ დებატებში მონაწილეობა", — განაცხადა ანა დოლიძემ ჟურნალისტებთან.

მან ასევე თქვა, რომ სწორედ ამ კრიზისზე საუბრობს და საუბრობდა წლების განმავლობაში. ამ პრობლემის გადაჭრა კი პოლიტიკური გზაა, რომელსაც დეპუტატები იანვრიდან უნდა დაუბრუნდნენ.

"სხვა შემთხვევაში, ჩვენ დღეს მოედანზე გვყავს მოსამართლეები, ისინი აქტიურად აკეთებენ პოლიტიკურ განცხადებებს, რაც ანგრევს სასამართლო სისტემის ძირითად პრინციპებს, რომ სასამართლო კორპუსი უნდა იყოს დამოუკიდებელი და აპოლიტიკური. დღეს ჩვენ ვნახეთ საბჭოს მოსამართლე წევრები, რომლებმაც ფაქტობრივად, გაიხადეს მანტია და პოლიტიკურ სათამაშო მოედანზე შევარდნენ", — განაცხადა ანა დოლიძემ.

იუსტიციის უმაღლესი საბჭოს მოსამართლე წევრები ეკა ბესელიასა და მის თანამოაზრეებს მუქარაში, სასამართლოზე ზეწოლასა და სასამართლოს საქმიანობაში ჩარევაში ადანაშაულებენ. ამის შესახებ მათ საგანგებო განცხადება გაავრცელეს.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი